भट्टराई निवासमा जसपाको बैठक बस्दै

२६ बैशाख, काठमाडाैं ।  जनता समाजवादी पार्टी ‘जसपा’को पदाधिकारी बैठक अहिले बसिरहेको छ । संघीय परिषद अध्यक्ष डा. बाबुराम भट्टराईको निवासमा भोलि सोमबार बस्न लागेको प्रतिनिधिसभा बैठकका बारेमा छलफल गर्न जसपाको बैठक बसेकाे हाे ।

प्रधानमन्त्री केपी ओलीले विश्वासको मत लिनका लागि प्रतिनिधिसभाको बैठक बोलाएपछि दलहरुमा अहिले दौडधुप चलिरहेको छ । आज प्रधानमन्त्री केपी ओली र कांग्रेस सभापति शेरबहादुर देउवासँगको भेटको ब्रिफिङ र थप आगामी रणनीति तय गर्न शीर्ष नेताको बैठक बसेको  बताइएको छ ।

आइतबार बिहान जसपा अध्यक्ष महन्थ ठाकुर र वरिष्ठ नेता राजेन्द्र महतोले प्रधानमन्त्री केपी शर्मा ओली र कांग्रेस सभापति शेरबहादुर देउवालाई भेटेका थिए । प्रधानमन्त्री ओलीलाई भेटेर विश्वासको मत दिन नसकिने जवाफ ठाकुर र महतोले दिएका छन् । यस्तै, देउवाले ओलीलाई विश्वासको मत नदिन र त्यसपछि बन्ने सरकारलाई समर्थन गर्न आग्रह गरेका थिए ।

देउवालाई पनि ओलीलाई विश्वासको मत नदिने जवाफ दिएका थिए । प्रधानमन्त्री ओलीले सोमबार विश्वासको मत लिदैँछन् । संसदमा एमालेका १२० सांसद छन् । विश्वासको मत पाउन १३६ मत चाहिन्छ । जसपामा हाल ३२ जना सांसद रहेका छन् ।

विपक्षीमा रहेका कांग्रेस, माओवादी विपक्षमा मतदान गर्ने निर्णय गरिसकेका छन् । यसअघि दुई धार देखिएको जसपाले ओलीलाई मत नदिए र तटस्थ बस्ने भएपछि ओलीले विश्वासको मत पाउने सम्भावना सकिएको छ ।