सामूहिक राजीनामाबारे निर्णय गर्न नेपाल समुह छलफलमा

२६ बैशाख, काठमाडौं । नेकपा एमालेको झलनाथ खनाल-माधव नेपाल समूहका सांसदहरु राजीनामाबारे सांसदसँग छलफल गर्दैछन् । प्रधानमन्त्री केपी ओलीले विश्वासको मत लिन आह्वान गरेको प्रतिनिधिसभाको विशेष अधिवेशनमा कस्तो रणनीति गर्ने भन्नेबारे नेपाल पक्षका सांसदहरूको छलफल सुरु भएको हाे ।

अहिले सिंहदरबारमा जारी छलफलले  सांसदहरुको सामूहिक राजीनामाबारे निर्णय गर्ने बताइएको छ । हिजो सांसदहरुको बैठकले सामूहिक राजीनामा दिने निष्कर्ष निकालेको थियो । सांसदहरुको छलफल अघि आइतबार नै नेपाल पक्षका स्थायी कमिटी सदस्यको बैठक बसेको थियो ।

भर्चुअल माध्यमबाट भएको बैठकले सांसदहरुसँग छलफल गरेर मात्र राजीनामाबारे कदम चाल्ने निर्णय गरेको एक स्थायी कमिटी सदस्यले बताए । ती नेताका अनुसार अहिलेसम्म राजीनामाकै सम्भावना बढी देखिएको छ ।

अध्यक्ष एवम् प्रधानमन्त्री ओलीले २ जेठ २०७५ को एमाले पार्टी संरचना, विधान र नेतृत्वमा फर्कन तयार नभएकाले सामूहिक राजीनामा दिने यो समूहले निष्कर्ष निकालेको छ । तर भोलि प्रधानमन्त्रीले विश्वासको मत लिन संसदको विशेष बैठक बस्ने भएकाले त्यसअघि नै वार कि पार गर्ने तयारीमा खनाल-नेपाल पक्ष जुटेको बताइएकाे छ ।