भैरवनाथ गणद्धारा विराटनगरमा ७५ बेड क्षमताको होल्डिङ्ग सेन्टर निर्माण

२६ बैशाख, विराटनगर । दुई दिनको छोटो अवधिमा नेपाली सेनाको भैरवनाथ गणले मोरङको विराटगरमा ७५ बेड क्षमताको होल्डिङ्ग सेन्टर निर्माण गरेको छ ।

कोभिड १९ को नयाँ भेरियन्टको संक्रमण दिनप्रतिदिन बढी रहेको समयमा मुलुककै विभिन्न ठाउँसहित भारत लगायतका देशबाट समेत आउने नेपालीहरुलाई तोकिएको समयसम्म राख्नका लागि होल्डीङ सेन्टर निर्माण गरिएको हो ।

विराटनगर महानगरपालिका वडा नं. १४ का रमेश यादवको घर भाडामा लिएर निर्माणका थालेको दुई दिनमा नेपाली सेनाले निर्माण सम्पन्न गरेर आइतवारदेखि सञ्चालनमा ल्याइएको छ । नेपाली सेनाको दुई नम्बर बाहिनी अड्डाका बाहिनीपति सहायकरथी चोकबहादुर ढकालको समन्वय र निर्देशनमा भैरवनाथ गणले होल्डङ्ग सेन्टर निर्माण सम्पन्न गरेको हो ।

कोभिड १९ को नयाँ भेरियन्टको संक्रमणले गर्दा नेपालका अधिकांश ठाउँमा निषेधाज्ञा जारी रहेको समयमा भारतसहित अन्य कुनै ठाउँबाट आउने व्यक्तिहरुलाई अहिलेको अवस्थामा घर जान ग्राहो पर्ने भएकोले होल्डिङ्ग सेन्टर संचालनमा ल्याएको भैरवनाथ गणका गणपति प्रमुख सेनानी गणेश रावलले बताए ।

त्यसैगरी नेपाली सेनाको सक्रियतामा विराटनगर जुट मिलमा एक हजार बेड क्षमताको होल्डिंग सेन्टरसहित आईसोलेशन पनि निर्माणको तयारी भएको गणपति रावलले जानकारी दिए ।

होल्डिङ्ग सेन्टरमा नेपाल सरकारले अपनाउन भनिएका सम्पुर्ण स्वास्थ्यका मापदण्ड अपनाएको छ भने यहाँ आउने सर्वसाधारणका लागि खाना र बस्नका लागि राम्रो प्रबन्ध गरिएको समेत जनाइएको छ । होल्डिङ्ग सेन्टरको समग्र सुरक्षा र व्यवस्थापन नेपाली सेनाले गर्नेछ ।

योसँगै भैरवनाथ गणले कोभिडबाट मृत्यु भएका सर्वसाधारणको शव व्यवस्थापनका लागि दुई वटा टोली बनाई काम गर्दै आएको छ। यस क्रममा सेनाले विराटनगरमा आजसम्म १८ वटा शव व्यवस्थापन गरिसकेको जानकारी गराएको छ ।