हालै आईपीओ जारी गरेको रु रु जलविद्युत् परियोजनाको यस्तो छ वित्तीय विवरण ?

२७ वशाख, काठमाडौं । हालै आईपीओ निष्कासन गरेको रु रु जलविद्युतले चालू आर्थिक वर्षको तेस्रो त्रैमाससम्म ६ करोड १३ लाख १२ हजार मुनाफा गरेको छ ।

गत वर्ष यो अवधिसम्म कम्पनीको मुनाफा ५ करोड ४३ लाख ४९ हजार थियो । गत वर्षभन्दा करीब १३ प्रतिशत बढी नाफा कम्पनीले गरेको हो ।

यस वर्ष मुनाफा बढेसँगै कम्पनीको जगेडा कोष रकम १५० प्रतिशत बढी १२ करोड २७ लाख ५८ हजार कायम भएको छ । कम्पनीले विद्युत् विक्रीबाट यस वर्ष १२ करोड २ लाख ९५ हजार आम्दानी गरेको छ । गत वर्ष यो आम्दानी ११ करोड ७० लाख ९२ हजार रहेको छ ।

गत वर्ष १६ दशमलव ८५ रहेको प्रतिशेयर आम्दानी यस वर्ष १८ दशमलव ६१ पुगेको छ । कम्पनीको प्रतिशेयर नेटवर्थ १३३ दशमलव ४६ रहेको छ ।

यस कम्पनीले चैत २० गतेदेखि २४ गतेसम्म सर्वसाधारणका लागि आईपीओ जारी गरेको थियो । कम्पनीले प्रिमियम सहित प्रतिकित्ता  १२० मा सर्वसाधारणमा आईपीओ विक्री गरेको हो । आईपीओ पश्चात कम्पनीको शेयरपूँजी ३६ करोड ६९ लाख ३४ हजार पुगेको छ ।

धितोपत्र दोस्रो बजारमा वैशाख २० गतेदेखि कारोबार शुरु भएको कम्पनीको शेयरमूल्यमा निरन्तर उच्च वृद्धि भइरहेको छ । आइतवार कम्पनीको शेयरमूल्य ९ दशमलव ८२ प्रतिशतले बढेर ५४८ पुगेको छ ।