नेपाल समुह पार्टी एकता जोगाउन असफल

२७ बैशाख, काठमाडौं । नेकपा एमालेको माधव-झलनाथ पक्षका सांसदहरूको बैठक सिंहदरबारमा सुरु भएको छ । माधव नेपालसहितका सांसदहरू उपस्थित भएलगत्तै बैठक सुरु भएको हो । पार्टी एकता जोगाउन गरिएको अन्तिम कसरत पनि सफल हुन नसकेको बताइएकाे छ ।

प्रधानमन्त्रीसमेत रहेका एमाले अध्यक्ष केपी ओलीलाई खनाल नेपाल समूहले आइतबार २०७५ जेठ २ को अवस्थामा फर्किनुपर्ने र आगामी दिनमा पार्टी सहमतिका आधारमा अघि बढाउनुपर्ने प्रतिबद्धता खोजेको थियो । तर, बिहान ९ बजेसम्म पनि पार्टी अध्यक्ष ओली पक्षबाट कुनै जवाफ नआएपछि माधव झलनाथ पक्षले एकता जोगाउन नसकिएको निष्कर्ष निकाल्दै राजीनामा दिन लागेको हो ।

प्रधानमन्त्री ओलीले विश्वासको मत लिनको लागि बोलाएको संसद विशेष अधिवेशन दिउँसो १ बजे बस्दैछ । साढे ९ बजे बस्ने बैठकमा प्रतिनिधिसभाको बैठकअघि माधव झलनाथ पक्षका केही सांसदहरुले राजीनामा दिने र नदिने विषयमा छलफल हुने स्रोतले जनाएको छ ।