ओलीले राजीनामा दिएर नयाँ सरकार गठनको बाटो खोल्नु नै उपयुक्त: प्रचण्ड

२७ बैशाख, काठमाडाैं ।  माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रधानमन्त्री केपी ओलीसँग संसदमा विश्वासको मत माग्ने नैतिक अधिकार नभएको बताएका छन् । सोमवार बसेको प्रतिनिधिसभाको बैठकलाई सम्बोधन गर्दै अध्यक्ष प्रचण्डले ओलीसँग मत माग्ने नैतिक अधिकार नभएको बताएका हुन् ।

बैठकलाई सम्बोधन गर्दै प्रचण्डले तीन वर्ष नपुग्दै कम्युनिस्ट एकता क्षतविक्षत हुन पुगेको बताएका छन् । बैठकमा उनले भने, ‘विडम्बना भन्नुपर्छ तीन वर्ष पुग्दानपुग्दै कम्युनिस्ट एकता पनि क्षतविक्षत हुन पुगेको, संविधान पनि नराम्रोसँग चिथोरिएको, कोपरिएको र त्यो संविधानलाई कोरोना लागेकोजस्तो, खासगरी सरकारको गतिविधिले संविधानलाई पनि कोरोना लागेजस्तो र आइसियूमा राखेकोजस्तो अवस्थाबाट हामी गुज्रिनुपरेको छ ।’

सोमबार सदनमा प्रधानमन्त्री ओलीको विश्वासको मतको प्रस्तावको विपक्षमा बोल्दै अध्यक्ष प्रचण्डले फागुन ११ गते प्रतिनिधिसभा पुनःस्थापना भएपछि पनि आफूले राजीनामा दिन सुझाएको स्मरण गराए। ‘मैले त्यतिबेला पनि उदाहरण दिँदै भनेको थिएँ, इनफ इज इनफ, प्रधानमन्त्री ओलीले राजीनामा दिएर नयाँ सरकार गठनको बाटो खोल्नु नै उपयुक्त हुन्छ,’ उनले भने ।

उनले ओली सरकारलाई समर्थन आफैंले गरेको बताउँदै उनले संघीयता क्षतविक्षत पारिएको र संविधानलाई कोरोना लागेर आइसीयूमा उपचार गराइरहेजस्तो देखिन पुगेको भन्दै चिन्ता व्यक्त गरे। उनले ओलीलाई वामगठबन्धनलाई तुहाउन पहिलो दिनदेखि नै लागेको आरोप समेत लगाए । उनले प्रतिनिधिसभा बिघटन गर्ने तर्क पार्टीभित्रको कचिंगललाई कारक बनाउने ? भन्दै प्रश्न गरे ।