ओली नेतृत्वको सरकार अब कामचलाउमा परिणत

२७ बैशाख, काठमाडौं । विश्वासको मत नपाएपछि प्रधानमन्त्री केपी ओली स्वतः पदमुक्त भएका छन्। दुई तिहाई मतसहितको सरकार बनाएका ओलीले विश्वासको मत पाउन नसकेका हुन्। प्रतिनिधिसभाको बैठकमा उपस्थित २३२ सांसदमध्ये ओलीको पक्षमा ९३ मत दिएका थिए।

यस्तै उनको विपक्षमा १२४ मत परेको छ। १५ जना सांसदले भने १५ तटस्थ बसेका थिए। योसँग प्रधानमन्त्री ओलीले प्रतिनिधिसभाबाट विश्वासको मत गुमाएका छन्। ओली नेतृत्वको सरकार अब काम चलाउमा परिणत भएको छ।

संविधानको धारा ७७ ‘१’ ‘ख’ अनुसार प्रधानमन्त्रीको पद रिक्त भएको छ। यस्तै धारा ७७ ‘२’ ग अनुसार मन्त्रीको पनि पद रिक्त भएको छ। धारा ७७ ‘३’ अनुसार अर्को मन्त्रिपरिषद् गठन नहुँदासम्म यसैले कार्य सञ्चालन गर्नेछ। प्रधानमन्त्री ओलीले प्रतिनिधिसभाबाट विश्वासको मत नपाएपछि अब अर्को सरकार गठनका लागि बाटो खुलेको छ ।

प्रधानमन्त्री ओलीले संसदको विश्वास गुमाएसँगै तीन वर्षसम्म चलेको कम्युनिष्ट सरकार ढलेको छ । शुरुमा सरकारसँग झण्डै दुई तिहाई बहुमत थियो । तर, नेकपाको विभाजन अनि एमालेभित्रको अन्तरकलहका कारण कम्युनिष्ट पार्टीले जनताबाट प्राप्त जनादेशअनुसार पाँच वर्षसम्म सरकार चलाउन नसकेको हो ।

सत्तारुढ दल नेकपा एमालेभित्र गत फागुनदेखिको विवाद कायमै छ । खनाल–नेपाल पक्षले सर्वोच्चको आदेश अनुसार पार्टी २०७५ जेठ २ गतेको अवस्थामा फर्किसकेको दावी गर्दै आएको थियो भने पार्टी अध्यक्ष ओलीले खनाल–नेपाल पक्षको अनुपस्थितिमा एकलौटी ढंगबाट गरिएको निर्णयबाट पछि नहट्ने अडान लिएका थिए । एमालेभित्र जारी यही विवादका कारण पनि ओली नेतृत्वको सरकार कुनै पनि बेला संकटमा पर्ने अवस्था कायमै थियो ।