बहुमतको सरकार गठनको आव्हानसँगै सत्ता समीकरणको कसरतमा दलहरु  

२८ बैशाख, काठमाडौँ  । राष्ट्रपति विद्यादेवी भण्डारीले बहुमतको सरकार गठनका लागि आह्वान गरेसँगै दलहरु नयाँ सरकार निर्माणका लागि सत्ता समिकरणको कसरतामा जुटेका छन् ।

हिजो प्रधानमन्त्री केपी शर्मा ओलीले प्रतिनिधिसभाबाट विश्वासको मत नपाउँदा पदमुक्त भएपछि राष्ट्रपति भण्डारीले विहिबार बेलुकासम्मको समयसीमा दिदै बहुमतीय सरकार गठनका लागि आब्हान गरेकी हुन ।

विश्वासको मत लिन नसकेको जानकारी संसद सचिवालयले गराएलगत्तै राष्ट्रपति भण्डारीले हिजो नै संविधानको धारा ७६ (२) अनुसार तीन दिनभित्र बहुमतको सरकार गठनका लागि आह्वान गरेकी हुन् ।

संविधानको धारा ७६ (२) मा राष्ट्रपतिले प्रतिनिधिसभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रतिनिधिसभाको सदस्यलाई प्रधानमन्त्री नियुक्त गर्नुपर्ने व्यवस्था छ ।

यसअघि प्रधानमन्त्री ओली संसद्‍मा विश्वासको मत पाउन असफल भएपछि कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल र जसपा अध्यक्ष उपेन्द्र यादवले संयुक्त विज्ञप्ति जारी गर्दै विपक्षी तीन दलका मुख्य नेताले संविधानको धारा ७६ को उपधारा २ बमोजिम नयाँ सरकार गठनको प्रक्रिया प्रारम्भ गर्न राष्ट्रपतिलाई आह्वान गरेका थिए