देउवा निवासमा गठबन्धन बैठक बस्दै

२८ वैशाख, काठमाडौं । राष्ट्रपति विद्यादेवी भण्डारीले नयाँ सरकार गठन गर्न तीन दिनको समय दिएपछि विपक्षी गठबन्धन चलायमान भएको छ । नयाँ सरकार गठन गर्नेबारे छलफल गर्न नेपाली कांग्रेसका सभापति शेरबहादुर देउवाले आज दिउँसो २ बजे आफ्नै निवासमा गठबन्धनको बैठक डाकेका छन् ।

बैठकमा वैकल्पिक सरकार बनाउने रणनीति बनाउन नेकपा माओवादी अध्यक्ष पुष्पकमल दाहाल ‘प्रचण्ड’ र जनता समाजवादी पार्टीका अध्यक्ष उपेन्द्र यादव बूढानीलककण्ठ जाँदैछन् । देउवाले एमालेकै असन्तुष्ट पक्षका नेता माधवकुमार नेपाललाई समेत बैठकमा आमन्त्रण गरेका छन् ।

देउवा निवास जानुअघि सबै राजनीतिक शक्तिले आफ्ना समूहको बैठक गर्दैछन् । नेकपा एमालेका असन्तुष्ट पक्षका नेताहरु आज बिहान नेता नेपाल निवासमा भेला भएका थिए । उनीहरुले अब पार्टी अध्यक्ष केपी ओलीसँग मिलेर जाने सबै ढोका बन्द भइसकेकाले उनलाई साइजमा ल्याउन भएपनि नयाँ सरकार बनाउनै पर्ने निश्कर्ष निकालेका छन् ।

भेलामा सहभागी नेता झपट रावलले भने–नेकपा एमाले विभाजन नहोस् भन्ने आम कार्यकर्ताको चाहना विपरित ओलीले विभाजन गर्नै लागेकाले हामीले यो रणनीति अपनाउने भएका हौं । सरकारबाट हटेपछि ओलीले पनि आफ्नो हैसियत थाहा पाउने र कार्यकर्ताको दबाब स्वीकार्न वाध्य हुने उनको भनाई छ ।

२ बजे आफ्नो पक्षको समेत देउवा निवासमा हुने बैठकमा सहभागिता रहने उनले प्रष्ट पारे । नयाँ गठबन्धनमा सामेल हुन नेपाल पक्षले आजै वा भोलिसम्म संसद्बाट राजीनामा दिने भएका छन् । तर उनीहरुले तत्काल संसद भंग नगर्ने र पूरै कार्यकाल चलाएर मात्रै निर्वाचनमा जानुपर्ने सर्त राख्ने बुझिएको छ ।

यसो गर्दा आफूहरुले पनि शक्ति सञ्चय गर्न समय पाउने र ओलीसँग भिड्न सक्षम हुने उनीहरुको बुझाई छ । आजको बैठकले जसपाभित्रको विवादलाई समेत संबाेधनको प्रयास गर्ने नेपाली कांग्रेस निकट स्रोतले बतायो ।

पार्टीका नेता एनपी साउदका अनुसार, बैठकमा जसपाका अध्यक्ष महन्थ ठाकुरलाई समेत बोलाइएको छ । यद्यपि उनी आउने जानकारी भएको छैन । तर आजको बैठकले ठाकुर पक्षको समेत सहमति जुटाएर नयाँ सरकार बनाउनमै बढी ध्यान दिनु आवश्यक रहेको उनले बताए ।