पाँचथरमा दिनहुँ थपिँदै कोरोना संक्रमित

२८ वैशाख,पाँचथर । जिल्लाका नयाँ भेरियन्टको कोरोना भाइरसका संक्रमितको सङ्ख्या दिनहुँ बढिरहेको छ । आज बिहानसम्ममा संक्रमितको सङ्ख्या ४७ पुगेको छ । सोमबार जिल्लामा १३ नयाँ संक्रमित थपिएका छन् । सदरमुकाम फिदिममा पाँच संक्रमित थपिएका छन् भने तुम्बेवामा पहिलो पटक एकजना संक्रमित फेला परेको स्वास्थ्य कार्यालय पाँचथरमा प्रमुख नारद सुवेदीले जानकारी दिए । फिदिममा यसअघि भेटिएका संक्रमितहरूको कन्ट्याक्ट टे«सिङमा परेकाहरूमा गरिएको एन्टिजेन परीक्षणमा नयाँ संक्रमित थपिएका हुन् ।

यता याङवरकमा सोमबार एकै दिन सात जनामा संक्रमण देखिएको छ । स्वास्थ्यकर्मीका अनुसार याङवरक–४ थर्पुमा पाँच र याङवरक–२ फलैँचामा दुई जनामा संक्रमण पुष्टि भएको हो । उनीहरू सबैको एन्टिजेन परीक्षण गरिएको हो । सोमबार नै थप सात जनाको पीसीआर परीक्षण गरिएको भए पनि नतिजा आउन बाँकी छ ।

यद्यपि जिल्ला प्रशासन कार्यालयको कोभिड–१९ दैनिक रिपोर्टअनुसार एकजना संक्रमित निको भएका छन् भने एक उपचारमा छन् । बाँकी सबै होम आइसोलेशनमा छन् । कार्यालयले रिपोर्टमा कूल संक्रमितको सङ्ख्या ४० उल्लेख गरेको छ । सोमबार नै ४ बजेभन्दा पछि याङवरकमा सातजना संक्रमित थपिएका हुन् । गत आइतबार मात्रै पाँचथरमा १७ जना संक्रमित थपिएका थिए ।

संक्रमितको सङ्ख्यामा वृद्धि भएसँगै आजदेखि पाँचथरमा निषेधाज्ञा जारी गरिएको छ । बिहान ९ बजेसम्म सदरमुकाम फिदिममा सार्वजनिक सवारीका साधन ठप्प प्रायः देखिएका छन् । निर्माण कार्यमा प्रयोग भएका सवारी भने सञ्चालनमा देखिएका छन् । बिहान ५ देखि ९ बजेसम्म अत्यावाश्यक सेवाका पसल तथा सेवा खुल्ला गरिएअनुसार पसल खुलेका छन् भने सडकमा सर्वसाधारणको उपस्थिति सामान्य छ । आजदेखि शुरु भएको निषेधाज्ञा एक साताका लागि जारी गरिएको हो ।