बहुमतीय सरकार गठनको समय घर्किदै, गुरुङ्ग नै पुन: मुख्यमन्त्री बन्ने !

२९ बैशाख, काठमाडौं । गण्डकी प्रदेशको मुख्यमन्त्रीमा नेकपा एमालेका गण्डकी प्रदेश संसदीय दलका नेता पृथ्वी सुब्बा गुरुङ्ग नै पुन: नियुक्ति हुने संभावना बढेको छ । बहुमतीय सरकार गठनका लागि आज दिउँसो ४ बजेसम्मको समय सीमा नजिकिदै गर्दा विपक्षीदलहरुले बहुमत दावी गर्न नसकेपछि गुरुङ्गङ्को संभावना बढेको हो ।  आज वेलुका ४ बजे सम्म  विपक्षी दलहरूले बहुमत पुर्‍याई नयाँ मुख्यमन्त्रीको नाम पेस गर्न सक्नुपर्छ। अन्यथा संविधान अुनसार प्रदेश सभामा सबैभन्दा धेरै सदस्य भएको दलका नेतालाई प्रदेश प्रमुखले मुख्यमन्त्रीमा नियुक्ति दिनुपर्ने हुन्छ।

नेपाली कांग्रेस, नेकपा माओवादी केन्द्र र जनता समाजवादी पार्टीले नयाँ सरकारको बनाउने प्रयास गरिरहेका भए पनि निर्णायक रहेको राष्ट्रिय जनमोर्चाका १ संसदले हस्ताक्षर गर्न नमानेपछि बहुमत पुग्न नसकेको हो । राष्ट्रिय जनमोर्चाका सांसद कृष्ण थापाले कांग्रेसलाई साथ दिन नसकिने बताएका छन्। केन्द्रबाट कांग्रेसलाई साथ दिन दवावा बढाएपनि उनले मानेका छैनन् । थापा पार्टीको निर्णयविपरीत उभिएका हुन्।

कांग्रेसबाट कृष्णचन्द्र नेपाली पोखरेललाई मुख्यमन्त्री बनाउने तयारी रहेपनि आवश्यक संख्या नपुग्ने देखिएको छ । ६० सदस्यीय प्रदेशमा एमालेका २७, कांग्रेसका १५, माओवादी केन्द्रका १२, राष्ट्रिय जनमोर्चाका ३, जसपाका २ र स्वतन्त्रबाट १ सांसद छन्। नयाँ सरकार गठन गर्न ३१ सांसद चाहिन्छ। गुरुङ्गले आइतबार विहान राजीनामा दिएपछि प्रदेश प्रमुखले गठवन्धन सरकारका लागि तीन दिनको समय सीमा दिएकी छन् ।