सर्वदलीय चुनावी सरकार बनाउन डा. भट्टराईको प्रस्ताव

२९ बैशाख, काठमाडौं । विपक्षी गठबन्धनले वैकल्पिक सरकार दिन मुश्किल भइरहेका बेला पूर्व प्रधानमन्त्रीसमेत रहेका जनता समाजवादी पार्टी संघीय परिषद अध्यक्ष डा. बाबुराम भट्टराईले नयाँ विकल्प सुझाएका छन् । उनले आज सामाजिक सञ्जालमा लेखेका छन्–वर्तमान र पूर्व प्रधानमन्त्रीहरु बाहेकको नेतृत्वमा सर्वदलीय सहभागिता हुने गरी राष्ट्रिय सरकार बनाउँ ।

उक्त सरकारलाई आगामी एक वर्षभित्र निर्वाचन गर्ने गरी कार्यादेश दिन समेत उनले प्रस्ताव गरेका छन् । यस्तो सरकार संविधानको धारा ७६(२) बमाजिमको हुनुपर्ने धारणा उनको रहेको छ । गएको सोमबार प्रधानमन्त्री केपी ओलीले प्रतिनिधिसभामा विश्वासको मत लिन नसक्दा पदमुक्त भएका छन् । राष्ट्रपति विद्यादेवी भण्डारीले संविधानको धारा ७६(२) अनुसार गठबन्धन सरकारको दाबी पेश गर्न भोलि वैशाख ३० गतेसम्मको म्याद दिएकी छन् ।

विपक्षी नेपाली कांग्रेस, नेकपा माओवादी केन्द्र र जसपाको उपेन्द्र यादव धार मात्रै ओलीको विकल्प दिन तयार भएकाले संख्या नपुगिरहेका बेला डा. भट्टराईले यस्तो प्रस्ताव गरेका हुन् । उनको प्रस्तावले आफ्ना पार्टीका दुई जना अध्यक्षहरु महन्थ ठाकुर वा उपेन्द्र यादवको नेतृत्वमा सरकार बनाउन खोजेको आभाष दिएको छ । मुलुकमा देखिएका संकट हल गर्न सबै दलको सहभागितामा सरकार बन्न आवश्यक रहेको उनको भनाई छ ।

उनले पूर्व प्रधानमन्त्री र प्रमुख दलका अध्यक्ष रहेको निर्देशक समिति बनाउन समेत सुझाएका छन् । डा. भट्टराईले प्रस्तुत गरेको यस्तो विकल्पबारे प्रमुख राजनीतिक दलहरुले कुनै प्रतिक्रिया दिएका छैनन् । तर उनको प्रस्तावमा सहमति जुट्ने सम्भावना न्यून रहेको बताइन्छ । खासगरी नेकपा एमाले र त्यसमा पनि ओली पक्षले यस्तो प्रस्ताव मान्ने स्थिति देखिएको छैन । तर विपक्षी गठबन्धनले जसपाका कुनै नेतालाई प्रधानमन्त्रीको प्रस्ताव गरी नयाँ सरकार बनाउने सम्भावनालाई भने संकेत गरेको छ ।