सरकार विवेकशील भईदिनुपर्यो : कार्यकारी निर्देशक, नर्भिक अस्पताल

२९ वैशाख, काठमाडौं । नर्भिक इन्टरनेशनल हस्पिटलका कार्यकारी निर्देशक राजेन्द्रबहादुर सिंहले सरकारलाई विवेकशील भई प्रस्तुत हुन आग्रह गरेका छन् । आज एक विज्ञप्ति जारी गर्दै सिंहले सो कुरा बताएका हुन् ।

विज्ञप्तिमा भनिएको छ, यो समय बाँच्ने र बचाउने समय हो । हामी नेपाल सरकारका सम्बद्ध निकायहरूका साथै सबै पक्षलाई संवेदनशील भएर कोभिडविरुद्धको लडाईमा अत्यन्त सुझबुझ र विवेकशील भै आ–आफ्नो दायित्व निर्वाह गरिदिनुहुन आह्वान गर्दछौं ।

कोभिड १९ को दोश्रो लहरको तीव्र संक्रमणपछि उत्पन्न जटिल परिस्थितिमा सर्वसाधारणलाई सहज उपचार दिने उद्देश्य लिई नर्भिक इन्टरनेशनल हस्पिटलले आफूलाई ‘कोभिड अस्पताल’को रुपमा रुपान्तरण गरि सेवा प्रदान गर्दै आएको छ ।

वर्तमान असहज अवस्था भएतापनि उपलब्ध सीमित साधनस्रोतको उच्चतम उपयोग गरी बिरामीहरुको उपचार सेवामा कुनै कमी नरहोस भनि अस्पताल प्रशासन प्रयत्नशील रहेको कुरा विज्ञप्तिमा उल्लेख गरिएको छ ।

तर, पछिल्लो अवस्थामा कोभिडको संक्रमण बढेसँगै अस्पतालमा प्राण वायुको रूपमा रहेको अक्सिजनको अभाव चरम बन्दै गएको छ ।राज्यको अनुदार नीतिले झन समस्यालाई बलझाएको छ र तोकिएको कोटाअनुसार अक्सिजन समेत उपलब्ध हुन सकेको छैन । यो अवस्था यसैगरि जारी रहने हो भने अकल्पनीय घटना घटन सक्ने अनुमान सहजै गर्न सकिन्छ ।

हामी आफ्नो कर्मप्रति समर्पित छौं । अक्सिजन लगायत अन्य उपचार सामग्री उपलब्ध भएसम्म बिरामीको उपचार सेवामा कुनै कमी हुन दिने छैनौ । साथै, स्थिति हाम्रो काबु बाहिर नजाओस भनि हामी प्रयत्नशील रहेको कुरा विज्ञप्तिमा उल्लेख गरिएको छ ।