निर्माणाधीन सभाहलको काम अन्तिम चरणमा, शुक्रबार प्रधानमन्त्रीले उद्घाटन गर्ने

२९ वैशाख, काठमाडौं । गोदावरीमा बनिरहेको सभाहलको काम अन्तिम चरणमा रहेको छ । यस दिनसम्म सभाहलको काम ९८ प्रतिशत पुरा भएको छ ।

उक्त सभाहलको यहि शुक्रबार प्रधानमन्त्री केपी शर्मा ओलीले उद्घाटन गर्ने भएका छन् । प्रधानमन्त्री ओलीले बालुवाटारबाट भर्चुअल रुपमा सभाहल उद्घाटन गर्ने कार्यक्रम तय भएको छ ।

शहरी विकास विभागका अनुसार सभाहलको करिब ९८ प्रतिशत काम सम्पन्न भएको छ । सभाहलको काम २०७६ कार्तिकमा सम्पन्न गर्ने गरी सुरु भएको थियो । सुरुमा ६२ करोड लागतमा ठेक्का लागेको सभा हलमा ८१ करोड खर्च भइसकेको छ ।

केसी-समानान्तर जेभीले ठेक्का पाएको यो सभाहल बनाउन २ पटक म्याद थप भएको थियो । ४३ रोपनी १५ आनामा बनेको सभाहलमा ३ हजार वटा सिटहरु छन् । सभा हल प्रवेश गर्ने साना हलहरु पनि छन् । पार्किङ र बगैँचा पनि बनाइएको छ ।

अहिलेसम्म सबै काम नसकिएकाले ठेकदारले सभाहल सरकारलाई हस्तान्तरण गरेको छैन । यो सभाहल कसले जिम्मा लिएर चलाउने हो भन्ने पनि तय भएको छैन ।