तेस्रो त्रैमासमा नेपाल दूरसञ्चार कम्पनीले कमायो करीब ६ अर्ब मुनाफा, ईपीएस कति ?

३० वैशाख, काठमाडौं । नेपाल टेलिकमले चालू आर्थिक वर्षको तेस्रो त्रैमाससम्मको वित्तीय विवरण सार्वजनिक गरेको छ ।

कम्पनीले चालू आर्थिक वर्षको तेस्रो त्रैमाससम्म आइपुग्दा ५ अर्ब ८८ करोड ४४ लाख ७२ हजार रुपैयाँ मुनाफा आर्जन गरेको छ । गत आर्थी वर्षको सोहि अवधिमा कम्पनीको यो नाफा २२ प्रतिशतले थोरै हो । गत वर्षको सोहि अवधिसम्म कम्पनीले ७ अर्ब ५६ करोड ५५ लाख १५ हजार रुपैयाँ मुनाफा गरेको थियो ।

कम्पनीको आम्दानीमा गिरावट आएसँगै मुनाफा पनि घटेको हो । चैत मसान्तसम्म कम्पनीले ३१ अर्ब ६७ करोड ३७ लाख रुपैयाँ आम्दानी गरेको छ । गत वर्षको सोहि अवधिको कम्पनीले ३२ अर्ब २७ करोड २३ लाखभन्दा बढी कुल आम्दानी गरेको थियो ।

हाल चुक्तापूँजी १५ अर्ब रुपैयाँ रहेको कम्पनीको जगेडा कोषमा ८२ अर्ब ९६ करोड ४९ लाख १४ हजार रहेको छ । कम्पनीको प्रतिशेयर आम्दानी ५२ रुपैयाँ ३१ पैसा र प्रतिशेयर नेटवर्थ ६५३ रुपैयाँ १० पैसा रहेको छ ।