बन्ला त बैकल्पिक सरकार ?

३० वैशाख, काठमाडौं । आज साँझ ९ बजेसम्म वैकल्पिक सरकार गठन गर्न राष्ट्रपतिले समयसीमा तोकेपनि त्यसको स्पष्ट आधार र चित्र भने देखिएको छैन । प्रमुख प्रतिपक्षी नेपाली कांग्रेसका सभापति शेरबहादुर देउवाको अगुवाईमा नयाँ सरकार बनाउन माओवादी केन्द्र र जनता समाजवादी पार्टी उपेन्द्र–बाबुराम पक्ष सकृय छन् । तर जसपाकै महन्थ–राजेन्द्र पक्षको असहयोगका कारण त्यस्तो सम्भावना दुर बन्दैछ ।

जसपा भित्रको मतमतान्तर अन्त्य गरी एकल धारणा बनाउन अहिले शीर्ष नेताहरुको बैठक बस्दैछ । बैठकमा डा. बाबुराम भट्टराईले हिजो सार्वजनिक गरेकै लाइनमा सरकार गठन गर्ने प्रस्तावमाथि छलफल हुने बताइएको छ ।

नेपाली कांग्रेसको समेत भावनालाई सम्मान गर्दै कांग्रेस–जसपाबीच आलोपालो प्रधानमन्त्री बनाउने गरी छलफल हुने स्रोतले बताएको छ ।
प्रतिनिधिसभाको बाँकी कार्यकालमा कांग्रेस सभापति देउवा र जसपा अध्यक्ष ठाकुर आधा आधा प्रधानमन्त्री रहने गरी सरकार चलाउने विषयमा छलफल केन्द्रित हुने बताइएको छ । यो प्रस्तावमा ठाकुर पक्ष सहमत भयो भने तत्कालै तीन दल बसेर निर्णय गरी राष्ट्रपति समक्ष लैजाने बुझिएको छ ।

तर महन्थ ठाकुर पक्षले यो प्रस्ताव समेत अस्वीकार गर्ने सम्भावना देखिएको छ । अर्काे उपाय भनेको नेकपा एमालेको माधव नेपाल पक्षको सामूहिक राजीनामा नै हो । ओलीलाई विस्थापन गर्ने हो भने यी नै दुई उपाय रहेका छन् ।

नेपाल पक्ष पनि पहिला जसपाको सिंगो निर्णय आओस् भनेर कुरिरहेको छ । जसपाले सग्लो निर्णय गरेर ओलीको विकल्प दिने अवस्था आयो भने नेपाल पक्षले राजीनामा रोक्ने भएको छ । नत्र आफू पक्षका २० सांसद्को सामूहिक राजीनामा संसद् सचिवालयमा बुझाउने उनको तयारी रहेको छ ।

जसपाको निर्णय मात्रै कुरेका हौं , नत्र हामी त राजीनामा गर्न तम्तयार छौं–नेपाल पक्षीय सांसद झपट रावलले बताए । तर ओली पक्ष भने नेपाल पक्षीय सांसद्हरुको राजीनामा जसरी भएपनि रोक्ने निश्कर्षमा पुगेका छन् । यस प्रयोजनका लागि ओलीले आज बिहानै अर्थमन्त्री विष्णु पौडेललाई कोटेश्वरस्थित नेपाल निवास पठाएका थिए ।

त्यस लगत्तै नेकपा एमाले आली पक्षीय स्थायी कमिटी बैठक बसिरहेको छ । नेपालले भने ओलीले आफूहरुलाई अल्मल्याउन मात्र यस्तो चाल चलेको बुझेका छन् । त्यसैले आज अपरान्ह् १२ बजेसम्म एउटा टुंगो लगाउने उनको मनस्थिति रहेको बुझिएको छ ।