नेपाल पक्षलाई फकाउँदै ओली

३० बैशाख, काठमाडाैं ।  सत्ता राजनीतिको केन्द्रमा आइपुगेको नेकपा एमालेका माधवकुमार नेपाल पक्षलाई आफ्नो पक्षमा पार्न विपक्षी काँग्रेस मात्र होइन एमाले अध्यक्ष एवं प्रधानमन्त्री केपी ओली पनि लागिपरेका छन् ।

नेपाल पक्षले राजीनामा दिएको अवस्थामा ओलीको विकल्पमा नयाँ सरकार बन्ने अवस्था रहेको छ । राजीनामा नदिंदा ओली नै संविधानको धारा ७६(३) अनुसार अल्पमतको सरकार बनाउन सक्षम हुने अवस्था छ ।

नेपाललाई फकाउन ओलीले आज बिहानै अर्थमन्त्री विष्णु पौडेललाई कोटेश्वर पठाएका थिए । नेपालसँगको भेटमा उनले राजीनामा नगर्न आग्रह गरेका थिए । नेपाल पक्षले राखेका माग र मुद्धाका सम्बन्धमा आजै स्थायी कमिटी बैठक राखेर संवोधनको प्रयास गर्ने प्रधानमन्त्री ओलीको सन्देश सुनाएका थिए ।

सोही बमोजिम अहिले वालुवाटारमा ओली पक्षको स्थायी कमिटी बसिरहेको छ । तर नेपाल पक्षका मागबारे सहमति जुट्न मुश्किल रहेको बुझाई उनीहरुको रहेको छ ।

साथै, यो ओली पक्षको ललीपप देखाउने रणनीति भएको बुझाई नेपाल पक्षको रहेको छ । मात्र राजीनामा रोक्ने उद्येश्यले मात्र यस्तो चाल चलिएको हुन सक्ने अनुमान उनीहरुले गरेका छन् ।