नेपाल र ओलीबीच भेट तय

३० बैशाख, काठमाडौं । नेकपा एमालेका अध्यक्ष केपी ओलीले राखेको प्रस्तावमा वरिष्ठ नेता माधवकुमार नेपालले सहमति जनाएका छन् । स्रोतका अनुसार अध्यक्ष ओलीले भेटवार्ताका लागि प्रस्ताव राखेका थिए, सोही प्रस्तावमा नेता नेपालले सहमति जनाएका हुन् ।

नेता नेपाल र ओलीबीच भेट तय भएको र कहाँ भेट्ने भन्ने बिषयमा कुराकानी भइरहेको स्रोतले जनाएको छ । बिहीबार बिहान नेता विष्णुप्रसाद पौडेलले नेता नेपालसँग भेटवार्ता गरेका थिए । भेटका क्रममा पौडेलले सांसद पदबाट राजीनामा दिँदा सरकार र पार्टी दुवै नजोगिने भएकाले छलफलमा बस्न प्रस्ताव राखेका थिए ।

तर नेपालले भने आफ्नो शर्त प्रस्ट भएको जवाफ दिएका थिए । नेता नेपालसँगको भेटपछि बालुवाटारमा ओलीले स्थायी कमिटी बैठक राखेका थिए । बैठकले नेता नेपाल, भीम रावल, घनश्याम भुसल र सुरेन्द्र पाण्डेमाथि कारबाही फिर्ताको निर्णयले वातावरण सकारात्मक बनाएको स्रोतले बताएको छ ।

प्रधानमन्त्री ओलीले प्रतिनिधिसभामा विश्वासको मत गुमाएसँगै राष्ट्रपतिले नयाँ सरकार गठनका लागि आह्वान गरेकी थिइन् । त्यो समय आज बेलुका ९ बजे सकिँदैछ ।

नेपालको संविधानको धारा ७६ को उपधारा ३ मा ‘प्रतिनिधिसभाको निर्वाचनको अन्तिम परिणाम घोषणा भएको मितिले तीस दिनभित्र उपधारा (२) बमोजिम प्रधानमन्त्री नियुक्ति हुन सक्ने अवस्था नभएमा वा त्यसरी नियुक्त प्रधानमन्त्रीले उपधारा (४) बमोजिम विश्वासको मत प्राप्त गर्न नसकेमा राष्ट्रपतिले प्रतिनिधि सभामा सबैभन्दा बढी सदस्यहरू भएको दलको संसदीय दलको नेतालाई प्रधानमन्त्री नियुक्त गर्नेछ ।’ भन्ने उल्लेख छ । अहिले सत्तासिन एमालेले भनेजस्तो यो धारा अनुरुप सरकार बने ओली नै पुनः प्रधानमन्त्री हुनेछन् ।