सञ्चार उद्यमीको घरमा ओली र नेपालबीच भेटघाट सुरु

३० वैशाख, काठमाडौं । सत्ताको लागि चरम अन्तद्र्वन्द्वमा अल्झेर विभाजनको डिलमा पुगेको नेकपा एमालेका दुई शीर्ष नेताहरु अध्यक्ष केपी ओली र माधवकुमार नेपालबीच अहिले निर्णायक छलफल सुरु भएको छ ।

राष्ट्रपतिबाट बहुमतको सरकार गठन गर्न दिएको समय अन्तिम घडीमा पुगिरहेका बेला एमाले अध्यक्ष एवं प्रधानमन्त्री ओली र वरिष्ठ नेता   नेपालबीच राजधानीको बूढानीलकण्ठस्थित सञ्चार उद्यमी तथा अन्नपूर्ण पोष्टका अध्यक्षसमेत रहेका क्याप्टेन रामेश्वर थापाको चपलीस्थित घरमा अहिले नेताद्वय छलफल जारी छ ।

बिहान बालुवाटारमा भएको एमाले स्थायी कमिटी बैठकले चार जना एमाले नेतामाथिको भएको कारवाही फुकुवा गर्दै ओली र नेपालबीच टेलिफोन वार्ता भएको थियो ।

नेपाल पक्षका २० जना सांसदले राजीनामा दिने अन्तिम तयारी गरिरहेका बेला ओली र नेपालबीच भेटवार्ता भएको हो । प्रधानमन्त्री ओली २०७५ जेठ २ को अवस्थामा फर्कन तयार नभएसम्म सामुहिक राजीनामाको अडानबाट पछि नहट्ने नेता माधवकुमार नेपालले आफू निकट नेताहरुलाई स्पष्ट पार्दै आएका छन् ।

नेपाल समुहको माग सबै कमिटीहरु २ जेठ २०७५ को अवस्थामा फर्कनुपर्छ भन्ने हो । यसमा ओली तयार हुन्छन् भने नेपाल समुहले इमान्दार सहमति कायम गर्ने बताउँदै आएको छ । अबको एकाध घण्टामा ओली र नेपालबीचको वार्तापछि कुरा मिल्यो भने ठीकै छ, नभए हाम्रोतर्फबाट सामुहिक राजीनामा आउँछ,’ माधव नेपाल निकट स्रोतले बताएको छ ।