वालिङमा ७८ संक्रमितले कोरोना जिते

३० बैशाख, वालिङ । वालिङ नगरपालिकाभित्रका ७८ जना कोरोना संक्रमित निको भएका छन् । विश्वब्यापी महामारीकोरुपमा फैलिएको नयाँ भेरियन्टसहितको कोभिड १९ बाट संक्रमितमध्ये ७८ जनालाई निको भएको स्वास्थ्य शाखा प्रमुख एवं जनस्वास्थ्य निरीक्षक कमलप्रसाद पाण्डेले जानकारी दिए ।

बिहीबारमात्रै १८ जना संक्रमित निको भएका हुन् । नगरपालिकाभित्र हालसम्म कूल संक्रमितको संख्या दुईसय ९३ रहेको छ । जसमध्ये ७८ जना निको भएका छन् भने पोखरामा ११ जना, गह«ौं प्राथमिक अस्पतालमा ५ जना गरी १६ जनाको अस्पतालमा उपचार भईरहेको छ । वालिङमा हालसम्म दुई सय ११ जना सक्रिय संक्रमित हुनुहुन्छ भने चार जनाको मृत्यु भएको छ ।

वालिङ नगरपालिकाभित्र संक्रमणको दर ह्वात्तै बढेर महामारीकोरुप लिएसँगै उच्च सतर्कता अपनाउन नगरपालिकाले नगरबासीहरुमा अनुरोध गरेको छ । महामारीका बेला जारी गरिएको निषेधाज्ञालाई कडाईका साथ पालना गरी जोखिम रोकथाम तथा नियन्त्रणका लागि सहयोग गर्न प्रमुख प्रशासकीय अधिकृत राजन भट्टराईले अनुरोध गरेका छन् ।

सक्रिय संक्रमितहरु होम आईसोलसनमा बस्दा कुनै पनि स्वास्थ्यसम्बन्धी समस्या भएमा तत्काल नगरपालिका कार्यालय, सम्बन्धित वडा कार्यालय वा स्वास्थ्यकर्मीहरुलाई तुरुन्त जानकारी गराउन पनि उहाँले अनुरोध गरे । संक्रमणदर विस्तारै घट्दै गएकाले अझै केही दिन उच्च सतर्कताका साथ त्रसित नभईकन घर÷घरमै बस्न प्रमुख प्रशासकीय अधिकृत भट्टराईले आग्रह गरेका छन् ।