प्रचण्डसँग छलफल सकियो, देउवाले परिस्थिति हेरेर कदम चाल्ने

३० बैशाख, काठमाडौं । नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ बीच भएको भेटवार्ता  सकिएकाे छ। करिब एक घण्टा लामो भेटवार्तामा पछिल्लो राजनीतिक परिस्थितिका बारेमा छलफल भएको थियाे ।

सरकार गठनका लागि बहुमतसहित दाबी गर्ने समय सकिन लाग्दासमेत ठोस सहमति जुट्न नसकेका बेला के गर्ने भन्ने विषयमा दुई नेताबीच छलफल भएको बताइएकाे छ ।

दुई पार्टीको मात्रै बहुमत नपुग्ने, जसपाभित्रको विवाद र एमालेकै माधव नेपाल पक्षधरको पनि राजीनामा नआइसकेको भन्दै कसरी अगाडि बढ्ने भन्ने विषयमा गहन छलफल भएको स्राेतले बताएकाे छ ।

देउवाले साँझसम्मको परिस्थिति हेरेर आवश्यक कदम चाल्ने बताएको स्रोतले जानकारी दिएको छ । आजै सभापति देउवाले पार्टी पदाधिकारी बैठक बोलाएका छन् । उक्त बैठकमा पनि पछिल्लो परिस्थितिका बारेमा नै छलफल हुने बताइएको छ।