ओली–नेपाल बीचको वार्ता सकियो, कार्यदल बनाएर पार्टी विवाद मिलाउने सहमति

३० बैशाख, काठमाडौं । एमाले अध्यक्ष केपी शर्मा ओली र वरिष्ठ नेता माधवकुमार नेपालबीच भएको वार्ता भर्खरै सकिएको छ । वार्ता साढे तीन घण्टा लामो चलेको थियो ।

वार्तामा कार्यदल बनाएर पार्टी विवाद मिलाउने कुराकानी भएको बताइएको छ । नेता नेपालका अनुसार २०७५ जेठ २ मा फर्कनका लागि छलफललाई जारी राख्ने निर्णय भएको छ ।

पार्टीलाई २०७५ जेठ २ गतेको अवस्थाबाट पुर्नजीवित गर्ने र त्यसपछिका गतिविधिहरु पार्टीभित्रको सहमतिका आधारमा गर्ने सहमति भएको हो । यससँगै नेपाल पक्षका सांसदले दिने भनिएको राजीनामा तत्काललाई रोकिएको छ। यसले एमालेमा अस्थायी युद्धबिराम भएको टिप्पणी गरिएको छ ।

एमाले विवाद निरुपणका लागि १० सदस्यीय कार्यदल बनाउने सहमति भएको छ । जसमा ओलीका तर्फबाट सुवास नेम्वांग, विष्णु पौडेल,शंकर पोखरेल, नेपालका तर्फबाट भीम रावल, सुरेन्द्र पाण्डे, घनश्याम भूषाल, गोकर्ण विष्ट रहेका छन् । अन्य ३ जना भने आपसी सहमतिमा थप्ने सहमति भएको छ ।

ओली र नेपालबीच सञ्चार उद्यमी रामेश्वर थापाको घरमा वार्ता भएको थियो । वार्तामा नेता नेपालले ६ वैशाखमा अघि सारेको ६ बुँदे प्रस्तावमाथि छलफल भएको थियो । त्यस क्रममा अध्यक्ष ओलीसँग फागुन २८ गतेको निर्णय फिर्ता र पार्टी कमिटी २०७५ जेठ २ को स्थितिमा फर्किने विषयमा कसरी अगाडि बढ्ने भन्ने विषयमा कार्यदल बनाएर छलफल गर्दै जाने सहमति भएको नेता नेपालले बताए ।

नेपाल समूहले सर्वोच्च अदालतबाट एमाले र माओवादी केन्द्र ब्युँतिएपछि एमालेको पार्टी कमिटी पनि एकताअघिको अवस्था अर्थात २०७५ जेठ २ मा पुग्नुपर्ने माग गरेको थियो । बिहीबार नेता नेपाल निकटका सांसदले विपक्षी गठबन्धनलाई सरकार निर्माणका लागि सजिलो हुने गरी राजीनामा दिने तयारी गरेपछि अध्यक्ष ओलीले नेता नेपाललाई फोन गरेर भेटको प्रस्ताव गरेका थिए ।

नेपाल र ओलीबीचको संवाद लम्बिएपछि संसद सचिवालयमा राजीनामा बुझाउने कार्यालय समय सकिएको थियो । यसअघि माधव नेपाल समूहले ओलीलाई जेठ २ मा फर्कन बेलुका ४ बजेसम्मको अल्टिमेटम दिएको थियो । वार्ता मिलेपछि सांसदहरुको राजीनामा नेता नेपालकै खल्तीमा कुहिएको छ ।

त्यस्तै, नयाँ सरकार गठनका लागि राष्ट्रपति विद्यादेवी भण्डारीले दिएको समय आजै सकिँदैछ । नेपाली कांग्रेस, नेकपा माओवादी केन्द्र सरकार गठनमा जुटे पनि बहुमत पु¥याउन नसकेर अन्यौलमा परेका थिए । राष्ट्रपतिले आज साँझ ९ बजेसम्मको समय दिएका कारण राष्ट्रपति कार्यालयका कर्मचारीहरु राति ९ बजेसम्म कांग्रेस–माओवादी गठबन्धनलाई कुर्न भने बाध्य हुने भएका छन् ।

ओली–नेपालबीच सहमति भएपछि कांग्रेस–माओवादी गठबन्धनले बहुमतको दावी पेश गर्न नसक्ने प्रष्ट भएको छ । त्यसपछि संसदको ठूलो दलको संसदीय दलको नेताको हैसियतमा पुनः केपी ओली नै प्रधानमन्त्री बन्नेछन् । ओली प्रधानमन्त्रीमा नियुक्त भएमा ३० दिनभित्र संसदबाट विश्वासको मत लिनुपर्ने संवैधानिक व्यवस्था छ ।