फेरि ओली नै प्रधानमन्त्री नियुक्त, शपथ भोलि !

३० बैशाख, काठमाडौं । नेकपा एमाले संसदीय दलका नेता केपी ओली प्रधानमन्त्री नियुक्त भएका छन् । राष्ट्रपति विद्यादेवी भण्डारीले संविधानको धारा ७६ ‘३’ अनुसार संसदको सबभन्दा ठुलो दलको संसदीय दलको नेता ओलीलाई प्रधानमन्त्रीमा नियुक्त गरेकी हुन् ।

ओलीले वैशाख २७ गते प्रतिनिधिसभामा विश्वासको मत गुमाएपछि राष्ट्रपति विद्यादेवी भण्डारीले आज वैशाख ३० गते राति ९ बजेसम्ममा बहुमत लिएर प्रधानमन्त्रीको दाबी पेस गर्न आह्वान गरेकी थिइन्।  राष्ट्रपति कार्यालय स्रोतका अनुसार शपथ भोलि शुक्रबार अपरान्ह हुनेछ ।

वैकल्पिक सरकार गठनको प्रयासमा जुटेका नेपाली कांग्रेस र माओवादी केन्द्र बहुमत जुटाउन असफल भए । जनता समाजवादी पार्टी ‘जसपा’को महन्थ ठाकुर-राजेन्द्र महतो पक्षले नयाँ सरकार गठनका लागि साथ दिएन भने एमालेको माधवकुमार नेपाल समूहका सांसदहरुले वैकल्पिक सरकार गठनका लागि बहुमत पुग्ने गरी राजीनामा दिएन ।

बहुमत नपुग्ने भएपछि कांग्रेस-माओवादी गठबन्धनले सरकारका लागि दाबी नै गरेन । त्यसपछि राष्ट्रपतिले ७६ ‘३’ अनुसार संसदको सबभन्दा ठुलो दललाई सरकार गठनको अवसर दिएकी हुन् । प्रधानमन्त्री ओलीले अब ३० दिनभित्र विश्वासको मत लिनुपर्छ, नभए धारा ७६’५’ अनुसार सरकार गठनको प्रयास हुनेछ । त्यो पनि असफल भए मुलुक मध्यावधि चुनावतिर जानेछ ।