जसपा र नेपाल तत्काल मन्त्रिमण्डलमा नजाने

३१ वैशाख, काठमाडौं । संविधानको धारा ७६ (३) अन्तर्गत अल्पमतको प्रधानमन्त्री नियुक्त भएका नेकपा एमाले अध्यक्ष केपी ओलीले आज दिउँसो पदको शपथ लिनुअघि जनता समाजवादी पार्टी र एमाले कै असन्तुष्ट पक्षलाई समेट्न खोजेपनि त्यसको सम्भावना देखिएको छैन् ।

प्रधानमन्त्री ओलीले अब बन्ने मन्त्रिमण्डलमा सहभागी हुन जसपाका महन्थ ठाकुर पक्ष र आफ्नै पार्टीका माधव नेपाल समूहलाई आग्रह गरेका छन् । तर दुबै पक्षले हाललाई सरकारमा सहभागी नहुने जनाउ दिएका छन् ।

तत्काल सानो आकारको मन्त्रिमण्डल गठन गरेर विश्वासको मत लिएपछि मात्रै विस्तार गर्ने ओलीको चाहना रहेको छ । सोही बमोजिम उनी नेपाल पक्षका दुई र जसपाका तीनजना समेटेर शपथग्रहण गर्न चाहन्छन् ।

तर दुबै पक्षले पहिला आफ्ना माग सम्वोधन होस् अनि मात्रै सरकारमा सहभागी हुने जनाउ प्रधानमन्त्रीलाई दिएका छन् । यस्तो जवाफ पाएपछि ओलीले आफू निकट नेताहरुलाई आज बिहानै बालुवाटार डाकेर छलफल गरेका छन् ।

छलफलमा अहिले सानो आकारको मन्त्रिमण्डल बनाउन ओलीलाई सुझाइएको संसदीय दलका उपनेता सुभाषचन्द्र नेम्बाङले बताए । आज बिहान नेता नेपालसँग कुरा भएको तर उहाँले पहिला पार्टी विवाद मिलोस् अनि मात्रै मन्त्रिमण्डलमा आफूहरु सहभागी हुने बताएको पनि उनले जानकारी दिए ।

यस्तै , प्रधानमन्त्री ओलीले आफैं फोन गरी जसपा अध्यक्ष ठाकुरलाई उपप्रधानमन्त्रीमा बसिदिन आग्रह गरेका थिए । ठाकुरले पनि आफ्नाे पार्टीले उठाएका माग पूरा नभएसम्म सरकारमा जान नमिल्ने प्रष्ट्याएका थिए ।

यसरी आजै सबै पक्षलाई समेट्न नसकिने अवस्था आएकाले ओलीले आज सानो आकारमा मन्त्रिमण्डल बनाउने भएका छन् । स्रोतका अनुसार, पहिलो चरणमा ईश्वर पोखरेल, विष्णु पौडेल, प्रदीप ज्ञवाली, रामबहादुर थापा र बसन्त नेम्बाङलाई उनले मन्त्री बनाउने भएका छन् ।