प्रचण्ड, उपेन्द्र देउवा निवासमा

३१ बैशाख, काठमाडौं । केपी ओली विरुद्ध गठबन्धन सरकार बनाउन विफल भएका प्रमुख प्रतिपक्षी नेपाली कांग्रेस, नेकपा माओवादी केन्द्र र जनता समाजवादी पार्टी उपेन्द्र समूहका नेताहरु अहिले बूढानीलकण्ठमा छलफलमा जुटेका छन् ।

हिजोसम्म बहुमतको गठबन्धन सरकार बनाउन राष्ट्रपति विद्यादेवी भण्डारीले समय दिएकोमा बहुमत जुटाउन विफल भएका यी दल आगामी रणनीति तयार गर्न कांग्रेस सभापति शेरबहादुर देउवा निवासमा भेला भएका हुन् ।

ओलीले आजै दिउँसो तेस्रो कार्यकालका लागि प्रधानमन्त्रीको शपथ लिंदैछन् । आफूहरुले राम्रै कसरत गरेको तर एमालेको माधव पक्ष र जसपाको महन्थ समूहले धोका दिंदा ओलीतन्त्रबाट छुटकारा नपाएको नेताहरुको बुझाई रह्यो ।

भेलामा सहभागी हुन पुगेका एक नेताले दिएको जानकारी अनुसार, हिजोको तयारीको समीक्षा गर्न र आगामी दिनमा कसरी जाने भन्ने सन्दर्भमा छलफल गर्न नेताहरु भेला भएका हुन् ।

उक्त समीक्षा बैठकमा नेपाली कांग्रेसका महामन्त्रीद्वय डा. शशांक कोइराला र पूर्णबहादुर खड्का, डा. प्रकाशशरण महत लगायत सहभागी छन् । यस्तै नेकपा माओवादी केन्द्रका पुष्पकमल दाहाल ‘प्रचण्ड’, प्रवक्ता नारायणकाजी श्रेष्ठ, पम्फा भूषाल, ओनसरी घर्ती मगरलगायत सहभागी छन् । यस्तै जसपाका उपेन्द्र यादव,डा. बाबुराम भट्टराई सहभागी रहेको बताइएको छ ।

बैठकको सुरुमै बोल्दै माओवादी प्रवक्ता श्रेष्ठले हिजो असफल हुनुको मुख्य कारण एमाले नेता माधवकुमार नेपालको द्वैध चरित्र भएको आरोप लगाए । नेपालको भर पर्दा नै नराम्ररी धोका भएको उनको भनाई थियो ।

यस्तै जसपा अध्यक्ष यादवले पनि महन्थ ठाकुर ओलीसँग बिकेकाले यस्तो अवस्था आएको आरोप लगाए । तर अझै पनि बजेट अधिवेशन र विश्वासको मत लिनुपर्ने अवस्था रहेकाले ओली सरकारलाई घेर्न सकिने उनीहरुको भनाई थियो ।

तर महन्थ पक्षले ओलीलाई समर्थन दियो भने वहुमत पुग्ने र ओली दुई वर्ष सत्तामा रहने अवस्था समेत आउन सक्ने भन्दै नेताहरुले चिन्ता प्रकट गरेका थिए । त्यस्तो अवस्थाबाट जोगाउन तीनै दलबीच मोर्चाबन्दी हुनुपर्ने धारणा प्रचण्डले राखेको स्रोतको भनाई छ ।