सरकारलाई असफल बनाउन खोज्नेहरू जन्डिसका बिरामी: ओली

३१ बैशाख, काठमाडौं । प्रधानमन्त्री केपी ओलीले प्रधानमन्त्री पदको शपथ लिएपछि प्रधानमन्त्री तथा मन्त्रिपरिषद कार्यालयमा पदभार ग्रहण गरेका छन् । प्रधानमन्त्रीको पदभार सम्हाल्दै प्रधानमन्त्री ओलीले आफूले सरकार बनाउन नसकेपछि प्रतिगमन भन्नेहरूले नक्कली क्रान्तिकारी चस्माबाट हेरेको टिप्पणी गरे ।

माओवादी केन्द्रका अध्यक्ष पुष्पकमल दाहाल ‘प्रचण्ड’तिर इंगित गर्दै ओलीले देशमा शान्ति स्थापना हुन नदिने, अस्थिरता छरिरहने र बबन्डर मच्चाइरहनेहरूले जनतालाई भ्रममा पार्न खोजेको आरोप लगाए ।

कोभिड– १९ का विरुद्ध छिमेकी राष्ट्रहरूले सहयोगको हात बढाइरहेको बेला देश र जनताप्रति चिन्तित नभई आफ्नो स्वार्थमा मात्र चिन्तित हुने प्रवृत्ति स्वीकार्न नसकिने बताए । कोभिडका विरुद्ध एकजुट भएर लड्नुपर्नेमा जनतालाई निराशा बनाउने र सरकारलाई असफल बनाउन खोज्नेहरू जन्डिसको बिरामी भएको बताए ।

उनले कसैलाई भ्रष्टाचार गरेको थाहा पाए हदैसम्मको कारबाही गर्ने प्रतिबद्धता जनाएका छन् । शपथका वाक्य र अक्षरको पालना गर्दै देश र जनताप्रति पूर्ण बफादार रहनेसमेत उनले प्रतिबद्धता जाहेर गरे ।

साथै उनले कोरोना महामारी नियन्त्रणका लागि राज्यको सबै शक्ति लगााउने बताएका हुन् । प्रधानमन्त्री ओलीले महामारीको अहिलेको समयमा सेवाभावका साथ सहयोग गर्न आग्रह गरेका छन् ।

उनले मुलुकका सबै अक्सिजन उद्योग पूर्णक्षमतामा चलाउन पनि आग्रह गरेका छन् । अक्सिजन ढुवानी र वितरणलाई व्यवस्थित बनाउने भन्दै प्रधानमन्त्री ओलीले आवश्यकता र विरामीको चापका आधारमा अक्सिजन पाउने व्यवस्था गर्ने पनि बताए ।

महामारीका बेला स्वास्थ्य सामग्री, औषधि र स्वास्थ्य सेवा उपलब्ध गराउने सम्बन्धमा भ्रष्टाचार र अनियमिता गर्नेमाथि सरकार कडाइका साथ प्रस्तुत हुने पनि प्रधानमन्त्री ओलीले बताए ।