ओलीले गरे राष्ट्रपतिलाई टेकओभर, त्यो पर्दैन !

३१ बैशाख, काठमाडौं । राष्ट्रपति विद्यादेवी भण्डारीले शुक्रबार नवनियुक्त प्रधानमन्त्री केपी ओलीलाई शपथग्रहण गराउँदै गर्दा प्रधानमन्त्री ओलीले ‘त्यो पर्दैन’ भन्दै टारेपछि यतिबेला उक्त वाक्य सामाजिक सञ्जालमा भाइरल भएको छ ।

राष्ट्रपति भण्डारीले शपथको रेडिमेड ढाँचा वाचन गर्दै ओलीलाई पद तथा गोपनियताको वाचा गराउँदै मुलुक र जनताप्रति पूर्णवफादार रही सत्य निष्ठापूर्वक “प्रतिज्ञा गर्छु…” भन्दै थिइन् । राष्ट्रपतिले दोहो¥याएर प्रतिज्ञा गर्छु भन्ने वाक्य के बोलेकी थिइन, उनलाई ओलीले रोके र “त्यो पर्दैन” भनेर टारे । राष्ट्रपति पनि हल्का हास्न थालिन ।

प्रधानमन्त्रीको शपथ लिइरहेका ओलीले मुलुक र जनताप्रति पूर्णवफादार रही सत्य निष्ठापूर्वकसम्म मात्रै भने । “प्रतिज्ञा गर्छु” भन्ने शब्द चाहिँ उल्लेख गरेनन् । राष्ट्रपतिको पदीय मर्यादालाई “त्यो पर्दैन” भन्दै ओलीले टारेको नेपाल टेलिभिजनबाट लाइभ प्रसारित भइरहेको थियो ।

त्यसपछि राष्ट्रपतिले हल्का हाँस्दै शपथका अन्य शब्दहरु अगाडि बढाइन् । एउटै पार्टीबाट राष्ट्रपति र प्रधानमन्त्री भएकाले हुनुपर्छ, राष्ट्रपतिले सहजै ओलीको निर्देशन स्वीकारिन । तर, राष्ट्रपतिको आग्रहलाई वेवास्ता गरेको दृश्य शोभनीय भने देखिएको थिएन ।

तेस्रो पटक प्रधानमन्त्रीको शपथ लिइरहेका ओलीले राष्ट्रपतिलाई टेकओभर गर्दै आफ्नै शब्द चयन गरेको विषयले स्वभाविक रुपमा समाजिक सञ्जालमा बहस त ल्याउन सुरु भैइसकेको छ । अहिले सोसल मिडियामा उनको शैलीलाई लिएर विभिन्न खाले टिकाटिप्पणी सुरु भैरहेका छन् ।