कोरोनाबाट पत्रकार कार्कीको मृत्यु, महासंघद्वारा दुःख व्यक्त !

२ जेठ, काठमाडौं । नेपाल पत्रकार महासंघ च्यानल नेपाल प्रतिष्ठान शाखा अध्यक्ष शान्तिराम कार्कीको कोरोना संक्रमणका कारण मृत्यु भएको छ। ३४ वर्षीय कार्कीको शनिबार साँझ उपचारका क्रममा मृत्यु भएको हो।

वैशाख १९ गते संक्रमण पुष्टि भएपछि उनी स्वयम्भूस्थित मनमोहन मेमोरियल अस्पतालमा उपचार गराइरहेका थिए। वैशाख २३ गतेदेखि उनलाई भेन्टिलेटरमा राखेर उपचार गरिएको थियो।

१४ दिनदेखि उपचाररत उनको शनिबार साँझ ८ बजे निधन भएको हो। झापा घर भएका कार्की डेढ दशकदेखि काठमाडौंमा रहेर सक्रिय पत्रकारिता गर्दै आएका थिए।

कार्कीको निधनप्रति नेपाल पत्रकार महासंघले दुःख व्यक्त गरेको छ। उनको निधनले नेपाली पत्रकारिता क्षेत्रले एउटा कुशल, ऊर्जाशील र जुझारु युवा पत्रकार गुमाएको महासंघले जनाएको छ।

महासंघका अनुसार हालसम्म कोरोना संक्रमणका कारण १३ पत्रकारको निधन भएको छ। ७५० पत्रकार संक्रमित भएका छन्। महासंघले कोरोना संक्रमणको चुनौतीपूर्ण अवस्थामा सम्भावित जोखिमको ख्याल गर्दै सम्पूर्ण स्वास्थ्य सुरक्षाका उपायहरू अवलम्बन गर्दै पेसागत कर्ममा जुट्न अपिलसमेत गरेको छ।