एनआरएन वेलायतको सहयोगमा अक्सिजन कन्सनट्रेटर नेपाल पठाउने तयारी

२ जेठ, काठमाडौं । बेलायतमा रहेका गैर आवसीय नेपाली समुदायको सहयोगमा  एक सय वटा अक्सिजन कन्सनट्रेटर नेपाल पठाउने तयारी गरिएको छ ।

नेपालमा बढ्दो कोरोना संक्रमणका कारण उत्पन्न स्वास्थ्य संकट समाधानका लागि दूताबासले संयोजन गरेको भर्चुअल कार्यक्रममा करीब सवा करोड बराबरको एक सय वटा अक्सिजन कन्सनट्रेटर नेपाल पठाउने तय गरिएको जानकारी गराइको हो ।

दूताबासको समन्वय र गैरआवासीय नेपाली संघ यूकेको पहलमा बेलायतस्थित अन्य २ सय भन्दा बढी संघसंस्थाले अक्सिजन पठाऔँ, आफन्त बचाऔँ अभियानमार्फत सो सहयोग गर्न गर्न लागिएको बेलायतका लागि नेपालका राजदूत लोकदर्शन रेग्मीले जानकारी दिएका छन् । ६४ वटा अक्सिजन कन्सनट्रेटर खरीदका लागि प्रतिबद्धता आइसकेको छ ।

केही दिनमै रकम संकलन र अक्सिजन कन्सनट्रेटर खरीद गरी यथाशक्य छिटो नेपाल पठाउने तयारी भइरहेको रेग्मीले बताए । यसअघि हिजो मात्रै गैरआवासीय नेपाली संघ ओमानको सक्रियतामा ५ सय ६० वटा अक्सिजन सिलिन्डर नेपाल ल्याइएको छ ।