दुई प्रतिशतले बढेको बजारमा १० अर्ब ४० करोडभन्दा बढीको कारोबार

२ जेठ, काठमाडौं । साताको पहिलो कारोबार दिन आइतवार शेयरबजार हालसम्मकै उच्च विन्दुमा पुगेको छ । यो दिन नेप्से परिसूचक २ हजार ७३८ दशमलव ३५ विन्दुमा पुगेको हो । यस अघि वैशाख २ गते नेप्सेले २ हजार ७३५ दशमलव ४६ विन्दु कायम गरेको थियो ।

त्यसपछिको उच्च विन्दु भने आइतवार कायम भएको हो । यसदिन नेप्से परिसूचक २ दशमलव शून्य २ प्रतिशत अर्थात् ५४ दशमलव २६ अंक बढेको हो । यसदिन २ हजार ६९३ दशमलव ९१ विन्दुदेखि खुलेको बजार निरन्तर बढेर बन्द भएको छ ।

नेप्सेले हालसम्मकै उच्च विन्दु कायम गरेको दिन १० अर्ब ४० करोड ३८ लाख ७९ हजार बराबरको शेयर कारोबार भएको छ । २१४ ओटा कम्पनीको १ लाख १३ हजार ६९ पटकको व्यापारमा उक्त रकम बराबरको २ करोड १३ लाख २८ हजार ८८२ कित्ता शेयर कारोबार भएको हो । नेप्सेमा तीन महिनापछि  १० अर्ब बराबरको शेयर कारोबार भएको हो ।

यसअघि गत फागुन ४ गते नेप्सेमा १० अर्ब ३ करोडभन्दा बढीको शेयर कारोबार भएको थियो । नेप्सेमा हालसम्मकै उच्च कारोबार रकम रू। १० अर्ब ६१ करोड ९१ लाख ६३ हजार रहेको छ । हालसम्मकै उच्च रकमको कारोबार भने गत माघ २६ गते भएको थियो ।

कुल कारोबार रकममा यो दिन सर्वाधिक हिस्सा नेपाल पुनर्बीमा कम्पनीले ओगटेको छ । उक्त कम्पनीको ८५ करोड २० लाख ३ हजार बराबरको शेयर कारोबार भएको हो ।

सर्वाधिक रकमको कारोबार भएको कम्पनीको शेयरमूल्य पनि एकै दिन प्रतिकित्ता ६२ ले बढेर अन्तिम मूल्य १ हजार ६४३ पुगेको छ । यो दिन नेपाल पुनर्बीमा कम्पनीको शेयरमूल्य न्यूनतम १ हजार ५९५ देखि १ हजार ६६० सम्म पुगेको थियो ।

आठ कम्पनीको शेयरमूल्यमा उच्च वृद्धि

आइतवार दोहोरो उच्च अंकले बढेको बजारमा आठ ओटा कम्पनीको शेयरमूल्यमा उच्च वृद्धि भएको छ । यो दिन रू रू जलविद्युत् परियोजनाको शेयरमूल्य १० प्रतिशतले र अन्य सात ओटा कम्पनीको ९ प्रतिशतभन्दा बढीले बृद्धि भएको हो ।

रू रू जलविद्युत् परियोजनाको प्रतिकित्ता ८० ले बढेर यो दिन अन्तिम मूल्य ८८० कायम भएको छ । त्यस्तै शिखर इन्स्योरेन्सको शेयरमूल्य ९ दशमलव ९७ प्रतिशत, समता घरेलु लघुवित्तको ९ दशमलव ९५ प्रतिशत , सप्तकोशी डेभलपमेण्ट बैंकको ९ दशमलव ९० प्रतिशत, प्रोग्रसिभ फाइनान्सको ९ दशमलव ९० प्रतिशत शेयरमूल्य बढेको छ ।

त्यसैगरी बरुण हाइड्रोको ९ दशमलव ८३ प्रतिशत , आइएमई जनरल इन्स्योरेन्सको ९ दशमलव ७६ प्रतिशत र विशाल बजार कम्पनीको ९ दशमलव ३७ प्रतिशत शेयरमूल्य बढेको छ ।

यो दिन शिखर इन्स्योरेन्सको प्रतिकित्ता १९३ ले बढेर अन्तिम मूल्य २ हजार १२८, समता घरेलु लघुवित्तको प्रतिकित्ता  ११६ ले बढेर अन्तिम मूल्य १ हजार २८२, सप्तकोशी डेभलपमेण्ट बैंकको प्रतिकित्ता २० ले बढेर अन्तिम मूल्य २२२, प्रोग्रेसिभ फाइनान्सको प्रतिकित्ता  २० ले बढेर अन्तिम मूल्य २२२, बरुण हाइड्रोको प्रतिकित्ता २९ ले बढेर अन्तिम मूल्य २४ , आइएमई जनरल इन्स्योरेन्सको प्रतिकित्ता ११२ ले बढेर अन्तिम मूल्य १ हजार २६० र विशाल बजार कम्पनीको प्रतिकित्ता ५५५ ले बढेर अन्तिम मूल्य ६ हजार ४७९ कायम भएको छ ।

कारोबारमा आएका  सबै समूहको परिसूचक बढे

यस दिन कारोबारमा आएका सबै समूहको परिसूचक बढेको छ । सर्वाधिक निर्जिवन बीमा समूहको ४ दशमलव २८ प्रतिशतले परिसूचक बढेको हो ।

त्यस्तै, बैंकिङ्गको १ दशमलव ५४ प्रतिशत, व्यापारिकको १ दशमलव ३ प्रतिशत, होटल्स तथा पर्यटनको १ दशमलव ११ प्रतिशत, विकास बैंकको ३ दशमलव ८७ प्रतिशत, जलविद्युतको १ दशमलव १५ प्रतिशत, वित्तको १ दशमलव १९ प्रतिशत, उत्पादन तथा प्रशोधनको १ दशमलव शून्य ६ प्रतिशत, अन्यको २ दशमलव १४ प्रतिशत, लघुवित्तको १ दशमलव ८९ प्रतिशत, जीवन बीमाको ३ दशमलव शून्य ४ प्रतिशत, म्युचुअल फण्डको शून्य दशमलव २८ प्रतिशत र लगानी समूहको २ दशमलव शून्य २ प्रतिशत परिसूचक बढेको छ ।