जेठ ६ सम्म नेपाल पक्षलाई अल्मल्याउने ओलीको तयारी

३ जेठ, काठमाडौं । सत्तारुढ दल नेकपा (एमाले) आन्तरिक विवाद सुल्झाउने क्रममा पार्टी अध्यक्ष केपी ओलीले जेठ ६ गतेसम्म माधवकुमार नेपाल पक्षलाई अल्मल्याउने आशंका बढेको छ । जेठ ६ गते राष्ट्रियसभाको उपनिर्वाचन रहेको र उपनिर्वाचनमा गृहमन्त्री रामबहादुर थापा बादललाई जिताउनै पर्ने भएकाले त्यतिबेलासम्म नेपाल पक्षलाई सबै विषयहरु मिलाउने भन्दै अल्मल्याउन थालेका हुन् ।

बैशाख ३० साँझ चार घण्टाको छलफलमा वरिष्ठ नेता माधवकुमार नेपालसँग एमालेको पूरानो संरचना २०७५ जेठ २ गते फर्काउने प्रतिबद्धताबाट एमाले अध्यक्ष ओलीले ३१ बैशाखमा बादललाई पनि बैठकमा राखेपछि ओलीले नेपाल पक्षलाई अल्मल्याउन खोजेको प्रष्ट भएको थियो । ओली नेतृत्वको सरकारले वैशाख २७ गते विश्वासको प्राप्त नगरेपछि सरकार ढलेको थियो ।

संसदमा नेपाल समूहका २८ सांसद उपस्थित नहुँदा ओली सरकार ढलेको थियो । राष्ट्रपति विद्यादेवी भण्डारीले दुई वा दुई भन्दा बढी दलहरु मिलेर सरकार बनाउन ३ दिनको समय दिएपनि नयाँ सरकार बन्न नसक्दा ओलीकै नेतृत्वमा नयाँ सरकार गठन भैसकेको छ । नयाँ सरकार बनेसँगै ओलीलाई बादल जिताउने चुनौति पनि थपिएको छ ।

यो चुनौतिका कारण ओली बाध्य भएर नेपालसँग सम्झौता गर्न पुगेका थिए । तर नेपाल पक्षले तत्काल बादललाई कुनै पनि कमिटीले नचिन्ने भएकाले अहिले नै बादलसहितको बैठक बस्न नसकिने जनाउन थालेको छ । ओलीले बादललाई बोकेर हिडेपछि ईश्वर पोखरेल पनि तनावमा रहेपनि पार्टी मिलाउँदा आफ्नो पालो नआउने भएकाले तत्काल पार्टी मिलाउन नखोज्ने पोखरेलले २०७५ जेठ २ को अवस्थामा पार्टीलाई ल्याउन चाहदैनन । ओलीले पार्टीको आन्तरिक विवाद मिलाउन नेपालसँग वैशाख ३० गते साँझ चार घण्टा छलफल गरेका थिए ।

सो छलफलमा ओलीले एमालेको पुरानो संरचनामा फर्कने र फागुन २८ गते गरेका निर्णयलाई कार्यदल बनाएर विवाद निरुपण गर्ने प्रस्ताव गरेपछि बैठक टुंगिएको थियो । सोही संवादको निरन्तरता स्वरुप ३१ गते दुवै पक्षका नेताहरुबीच सिंहदरवारमा तीन घण्टा छलफल भएको थियो । छलफलमा ओली पक्षले गृहमन्त्री समेत रहेका बादललाई पनि सहभागी गराएपछि नेपाल पक्षले ओलीको इमानदारितामाथि आशंका गरेको मात्र छैन यो अल्मल्याउने प्रयास मात्रै भएको बुझ्न थालेको छ ।

नेपाल पक्षका केन्द्रीय सदस्यहरुले नेपाललाई शनिवारको बैठकमा ओलीले रामबहादुर थापालाई शुक्रबारको बैठकमा सहभागी गराएको विषयमा आपत्ति जनाएका थिए । ओलीले पार्टीभित्र जसरी पनि पेल्ने नीति लिएको बताउदै सचेत रहन आग्रह गरेका थिए । उनीहरुले थापालाई सहभागी गराएर २०७५ जेठ २ मा फर्कन अस्वीकार गरेको सन्देश दिएको जनाएका थिए ।

प्रधानमन्त्रीका परराष्ट्र सल्लाहकार राजन भट्टराइले पनि २०७५ साल जेठ २ गते फर्कन नसक्ने बताइरहेका छन् । त्यही बेला बसेको नेपाल पक्षको केन्द्रीय सदस्यहरुको बैठकले ओलीले नै सरकार बनाउने चालवाजीमा लागेको र यसले अल्मल्याउदै जाने रणनीति लिएको प्रष्ट हुने बताएका थिए । नेपाल पक्षका नेता शनिबार बिहान ११ बजे बैठक बसेको थियो ।

उनीहरुले ओली जेठ २ मा फर्कने कुराप्रति संवेदनशील बन्न नसकेको बताएका थिए । शुक्रबार सिंहदरबारमा बसेको बैठकले २०७५ जेठ २ भन्दा अघिको एमालेलाई आधार मानेर अरु छलफल अघि बढाउने कुरा भएको र त्यसका लागि अध्यक्ष ओली र वरिष्ठ नेता माधवकुमार नेपाल बसेर कार्यदल टुंग्याउने कुरा भएको भीम रावल बताएका थिए ।

तर नेपाल पक्षको केन्द्रीय सदस्यहरुले थापासहितको बैठकमा सहभागी हुनु नै गलत भएको बताएका थिए । त्यही बैठकमा बादलसमेत बसेका कारण कार्यदल बन्न सकेको थिएन । ओली पक्षले कार्यदलमा बादल पनि प्रस्ताव गर्न सक्ने भएकाले नेपाल पक्षले ३१ जेठमा कार्यदल बनाउने बारेमापछि छलफल गर्ने भन्दै निस्केर हिडेका थिए ।