अक्सिजन प्लान्टका लागि टेन्डर, जडान अक्सिजन कन्सन्ट्रेटर !

३ जेठ, काठमाडौं।  जिल्ला अस्पताल सल्यानले अक्सिजन प्लान्टका लागि टेन्डर आह्वान गरेको भएपनि खरिदमा आर्थिक चलखेल गर्दै अक्सिजन कन्सन्ट्रेटर जडान गरेको तथ्य बाहिर आएको छ ।  यस विषयलाई लिएर जिल्ला प्रशासन कार्यालय सल्यानमा ‍ लिखित उजुरी परेपछि छानविन प्रशासनले छानविन  समिति गठन गरी अनुसन्धान सुरु गरिएको छ । अक्सिजन प्लान्ट भनेर अक्सिजन कन्सन्ट्रेटर जडान भएको र उक्त मेसिन खरिदमा अनियमितता भएको उजुरी परेपछि आइतबार छानविन समिति गठन अध्यान सुरु गरिएको हो ।

प्रशासन कार्यालयमा उजुरी परेपछि सहायक प्रमुख जिल्ला अधिकारी थमन खड्काको संयोजकत्वमा कोष तथा लेखा नियन्त्रण कार्यालयका कर्मचारी,  शारदा नगरपालिकाको स्वास्थ्य शाखा प्रमुख र बायोमेडिकल इन्जिनियर सदस्य रहेको छानविन समिति गठन गरिएको प्रमुख जिल्ला अधिकारी लक्ष्मीदेवी होमागाईले जानकारी दिइन।

दोषी ठहरिए जो कोहीलाई पनि कारवाहीको दायरामा ल्याइने र भुक्तानी पनि रोक्का गरिएको र  यदि खरिद कर्ताले नै गडबढी गरेको पाइए उक्त कम्पनीलाई कालो सूचीमा राखिने उहाको भनाई छ ।अक्सिजन प्लान्ट भनेको अक्सिजन कन्सन्ट्रेटर भएको र अक्सिजन कन्सन्ट्रेटरलाई त्यतिधेरै पैसा नपर्ने चिकित्सकहरुले बताएका छन् ।  स्वास्थ्य सेवा कार्यालय सल्यानका निमित्त स्वास्थ्य व्यवस्थापक दशरथ श्रेष्ठले अक्सिजन प्लान्ट भनेर नै टेन्डर आह्वान गरिएको तर कम्पनीले भने अर्कै समान पठाएको जानकारी दिएका छन् ।

स्वास्थ्य सेवा कार्यालयले अक्सिजन प्लान्ट भन्दै ४९ लाखमा खरिद गरेको जानकारी दिएको छ । स्वास्थ्य सेवा कार्यालय सल्यानमा गत मंसिरमा आह्वान गरेको टेन्डरमा ड्रायोजन मेडिटेक प्रा.लि. सुर्खेतले ठेक्का पाएको थियो ।