जीवन बीमा कम्पनीः तेस्रो त्रैमासमा सबैभन्दा धेरै मुनाफा गर्नेको पहिलो नम्बरमा नेपाल लाइफ, अन्यको अवस्था कस्तो ?

४ जेठ, काठमाडौं । चालू आर्थिक वर्षको ९ महीनामा जीवन बीमा कम्पनीहरूले ३ अर्ब २० करोड ८८ लाख मुनाफा कमाएका छन् । नेपालमा सञ्चालित जीवन बीमा कम्पनीले हालै सार्वजनिक गरेको तेस्रो त्रैमाससम्मको वित्तीय विवरणले यस्तो देखाएको हो ।

कम्पनीहरूको उक्त मुनाफा गत आवको सोही अवधिको तुलनामा १९ दशमलव ०८ प्रतिशत बढी हो । गत आवको चैत मसान्तसम्ममा कम्पनीहरूले २ अर्ब ६९ करोड ४६ लाख मुनाफा कमाएका थिए ।

तेस्रो त्रैमासिकसम्म अधिकांश कम्पनीको मुनाफा, प्रतिशेयर आम्दानी, खुद बिमा शुल्कलगायतका प्रमुख सूचकहरुमा विस्तार भएको छ । पुँजी सबैभन्दा बढी भएको नेपाल लाइफ प्रमुख सूचकहरुमा पनि अगाडि आएको छ ।

त्यस्तै, यसै वर्ष आईपीओ जारी गरेका ३ कम्पनीले पनि आक्रामक रुपमा बजार विस्तार गरेका छन् ।

हेरौं कुन जीवन बिमा कम्पनीको अवस्था अहिलेसम्म कस्तो ?

सबैभन्दा धेरै मुनाफा कमाउनेको पहिलो नम्बरमा नेपाल लाइफ रहेको छ । चालु आर्थिक वर्षको तेस्रो त्रैमाससम्म आइपुग्दा सबैभन्दा धेरै मुनाफा गर्नेमा नेपाल लाइफ इन्स्योरेन्स रहेको छ । कम्पनीले गत वर्षको तुलनामा ८.३६ प्रतिशतले ले मुनाफा वृद्धि गरी ५० करोड ६६ लाख ६८ हजार रुपैयाँ पुर्याएको छ ।

यसअवधिमा १० वटै कम्पनीको खुद नाफा बढेको छ । सबैभन्दा धेरै नाफा बढ्नेमा प्रभु लाइफ इन्सुरेन्स रहेको छ । यसको मुनाफा १४८.३३५ ले बढेर १३ करोड ७८ लाख ३८ हजार रुपैयाँ पुगेको छ ।