सानो आकारको मन्त्रिमण्डल बनाउँदै मुख्यमन्त्री गुरुङ

५ जेठ, काठमाडौं । गण्डकीका मुख्यमन्त्री पृथ्वीसुब्बा गुरुङले मन्त्रिमण्डल विस्तार गर्ने तयारी गरेका छन्। मुख्यमन्त्रीको सचिवालयले दिएको जानकारी अनुसार तत्काललाई सानो आकारको मन्त्रिमण्डल बनाइने छ। नयाँ मन्त्रिमण्डलको केही मन्त्रालयमा पुरानै अनुहार दोहोरिने जनाइएको छ।

जसअन्तर्गत आर्थिक मामिला तथा योजना मन्त्रालयमा किरण गुरुङ, भौतिक पूर्वाधार विकास मन्त्रालयमा रामशरण बस्नेत दोहोरिने स्रोतले जानकारी दिएको छ। यसैगरी मुख्यमन्त्री गुरुङको राजीनामाको केही दिन अघिमात्रै नियुक्त भएका राजीव गुरुङ ‘दीपक मनाङे’ले पनि निरन्तरता पाउने सचिवालयले जनाएको छ।

वैशाख २९ गते पुनः मुख्यमन्त्रीको शपथ लिएपछि उनले मन्त्रिमण्डल विस्तार गर्न सकेका थिएनन्। कोरोना संक्रमणका कारण हाल उनी होम आइसोलेसनमै छन्।