नेपाल पक्षलाई मनाउन नसकेपछि बादल तनावमा, देवकोटाले निर्वाचन जित्ने

५ जेठ, काठमाडौं । नेकपा एमालेको माधव नेपाल पक्षले राष्ट्रियसभा सदस्यको उपनिर्वाचनमा नेकपा एमालेको तर्फबाट उम्मेदवार बनेका गृहमन्त्री रामबहादुर थापा ‘बादललाई भोट नदिने प्रष्ट पारेसँगै गृहमन्त्री ‘बादल तनावमा परेका छन् ।

नेपाल पक्षको सहयोग नभएमा निर्वाचनमा हार्ने  देखेर उम्मेदवारी दिन हच्किएका ‘बादल’ प्रधानमन्त्री केपी शर्मा ओलीले माधव नेपालको शर्त स्वीकार गरेर भएपनि उनलाई जिताउने आश्वासन दिएपछि अन्तिम समयमा हेलिकप्टर चार्टर गरेर उम्मेदवारी मनोनय गर्न हेटौडा पुगेका थिए । अहिले आएर ओली बादललई विजयी गराउन नेपाल पक्षको मत पाउने वातावरण निर्माणमा नलाग्दा बादल थप तनावमा परेका हुन ।

त्यसो  त गृहमन्त्री बादललाई हराउन नेपाल पक्षमात्र होइन, ओली पक्षकै नेताहरु सक्रिय रहेको पाइएको छ । भोली हुने मतदानका लागि हेटौडा पुगिसकेका ओलीपक्ष मानिने एक स्थानीय तहका प्रमुखले भने ‘ बादललाई भोट हाल्न महासचिवले निर्देशन त दिनुभएको छ ।वास्तविक एमाले र पाहुँना एमाले कसलाई भोट हाल्ने ? त्यो हाम्रो विवेकको कुरा हो । मतदान गोप्य नै हुन्छ हैन ? ‘उनको यो भनाईले पनि ओली पक्ष सबैले बादललाई भोट हाल्ने कुरामा आंशका पैदा भएको छ ।

यही अवस्था रहे ओली पक्षका मतदाताहरुको भोट समेत खिमलाल देवकोटालाई जाने भएपछि देवकोटाको विजयी सुनिश्चित बनेको देखिन्छ ।  ‍अन्तिम समयमा प्रधानमन्त्री ओली पक्षका नेताहरु नै बादललाई जिताउन ध्यान नदिएपछि बदलले आफु निकट नेताहरुलाई षडयन्त्रको गन्ध आएको भन्न लागेको भनि एमाले नेताहरुले टिपणी गर्न लागेका छन् ।

उपनिर्वाचनमा बदालले हार्ने संभावना बढदै गएपछि मतदातालाई भ्रममा पार्न सरकारी संचारमाध्यमको दुरुपयोग गरिएको छ । बादलले माधव नेपालसँग भेटगरेपछि नेपाल टेलिभिजनको अनलाइनमा नेपाल पक्षले बादललाई भोटहाल्ने भन्दै ‘बादललाई सहयोग गर्ने नेता नेपालको बचन‘ हेडलाइनमा समाचार संम्प्रेषण गर्न लगाइएको थियो ।

उक्त समाचार आएको केही बेरमा वरिष्ठ नेता नेपालको सचिवालयले बादललाई सहयोग गर्न नसकिने र आफ्नो उम्मेदवार देवकोटा रहेको भनि तत्कालै त्यस्ता खवरहरु गलत रहेको भनि खण्डन गर्यो । नेपाल पक्षले मतदाताहरुलाई भ्रममा नपरी देवकोटालाई मतदान गर्न आग्रह गरेको छ ।

वागमती प्रदेशका १ सय ९ प्रदेशसभा र १ सय १९ स्थानीय तहका प्रमुख तथा उपप्रमुख मतदाता रहेका छन् । राष्ट्रियसभा निर्वाचनमा एक प्रदेश सांसदको मतभार ४८ हुन्छ भने स्थानीय तहका प्रमुख र उपप्रमुकको समान १८/१८ मतभार हुन्छ। सबैभन्दा बलियो मानिएको एमालेको मतभार ५ हजार १ सय ३० छ । कांग्रेसको २ हजार २ सय ८० छ भने माओवादी केन्द्रको १ हजार ६ सय ९८ हुन्छ । आफूहरूसँग १ हजार ७ सय ४ मतभार रहेको नेपाल पक्षको दावी छ । त्यसैले एमालेको मत विभाजित हुँदा केही तलमाथि भए पनि देवकोटाले सहजै निर्वाचन जित्ने देखिन्छ ।

बागमती प्रदेशको तर्फबाट राष्ट्रियसभा सदस्यका लागि भोली हुने उपनिर्वाचनमा दुबै जना एमालेका तर्फबाट उम्मेदवार रहेका छन् । संघीयता विद देवकोटा स्वतन्त्र उम्मेदवारको रुपमा उठेपनि उनलाई नेपाली कांग्रेस, माओवादी केन्द्र र एमालेको नेपाल पक्षको साथ रहेको छ । बादल ओली पक्षका उम्मेदवारको रुपमा चुनावी मैदानमा रहेका छन् ।