बादललाई भोट हाल्न प्रधानमन्त्री ओलीको निर्देशन

५ जेठ, काठमाडौं ।  नेकपा एमालेका अध्यक्षसमेत रहेका प्रधानमन्त्री केपी शर्मा ओलीले गृहमन्त्रीसमेत रहेका पार्टीका नेता रामबहादुर थापा बादललाई मत दिन निर्देशन दिएका छन् । पार्टी अध्यक्षको तर्फबाट एक अपील जारी गर्दै ओलीले भोली हुने राष्ट्रिय सभा सदस्य निर्वाचनमा पार्टीका उम्मेदवार थापालाई मत दिन निर्देशन दिएका हुन।

पार्टीको निर्वाचन चिन्नह र आधिकारिक उम्मेदवारबाहेक अरूलाई मत दिनु कल्पना बाहिरको भएको रर पार्टी अनुशासन विपरित यस्ता प्रवृत्ति स्वीकार्य नहुने पनि ओलीको भनाई छ ।‘जेठ ६ गते बागमती प्रदेशबाट प्रतिनिधित्व हुने राष्ट्रिय सभा सदस्यको रिक्त पदमा कमरेड रामबहादुर थापा हाम्रो उम्मेदवार हुनुहुन्छ। उहाँ नेपालको कम्युनिष्ट आन्दोलनको एक जना वरिष्ठ नेता हुनुहुन्छ,’ उहाँको विजयले कम्युनिष्ट आन्दोलन भावनात्मक एकतामा समेत बल पुग्नेछ। तसर्थ यस निर्वाचनमा एकतावद्ध भएर आफ्ना पार्टीका उम्मेदवारलाई बिजयी बनाउनु हुन आग्रह गर्दछु।’ ओलीले भनेका छन् ।

राष्ट्रिय सभा निर्वाचनमा एमालेबाट थापा र स्वतन्त्र उम्मेदवार संघीयताविज्ञ खिमलाल देवकोटा चुनावी प्रतिस्पर्धामा हुनुहुन्छ । देवकोटालाई एमालेको नेपाल पक्ष, नेपाली कांग्रेस, नेकपा माओवादी केन्द्रलगायत दलको समर्थन र सहयोगमा उम्मेदवार छन्।