ओलीले मौन अवधिमा निर्वाचन आचारसंहिताको धज्जी उडाएपछि आयोगको ध्यानाकर्षण

५ जेठ, काठमाडौं । मौन अवधिमा वक्तव्यबाजी गरेको भन्दै निर्वाचन आयोगले आफ्नाे ध्यानाकर्षण भएकाे जनाएकाे छ । आयोगले बिहीबार हुन लागेको बागमती प्रदेशमा रिक्त रहेको राष्ट्रियसभा उपनिर्वाचनका लागि मौन अवधि सुरु भइसकेपछि पनि आचारसंहिता विपरित वक्तब्य दिने, प्रेस विज्ञप्ति निकाल्ने, प्रकाशन तथा प्रसारण गर्ने कार्य भएको भन्दै गम्भीर ध्यानाकर्षण भएको जनाएको हाे ।

बुधबारमात्रै प्रधानमन्त्री केपी ओलीले पार्टीको तर्फबाट उम्मेदवार बनेका रामबहादुर थापा बादलको पक्षमा मौन अवधिमा निर्वाचन आचारसंहिताको धज्जी उडाउँदै अपील जारी गरेका थिए ।

निर्वाचनको सिलसिलामा राजनीतिक दल, सार्वजनिक निकाय तथा सञ्चारमाध्यम लगायतले पालना गर्नुपर्ने आचारसंहिता समेत लागू भइसकेको सन्दर्भमा आचारसंहिता विपरितका यस्ता क्रियाकलापले निर्वाचनको स्वच्छता र विश्वसनीयताप्रति नै आघात पार्ने आयोगले बुधबार एक विज्ञप्तिमार्फत उल्लेख गरेको छ ।

आयोगले निर्वाचन आचारसंहिता कडाइका साथ लागू गर्न नसक्ने भनी आलोचना पनि गर्ने र अर्कोतर्फ आफैं आचारसंहिता विपरितका गतिविधिमा संलग्न हुनु कुनै पनि दृष्टिकोणबाट स्वीकार्य हुन नसक्ने आयोगले जनाएको छ ।

आयोगले निर्वाचन आचारसंहिता विपरितका कार्य गर्ने व्यक्ति वा संस्थालाई कानून बमोजिम कारवाही गर्न सक्ने कुरा प्रष्ट गर्दै यसरी आचारसंहिता विपरीत कार्य गर्नेको अभिलेख राख्ने राखिएको जनाएको आयोगका प्रवक्ता राजकुमार श्रेष्ठले जारी गरेको विज्ञप्तिमा उल्लेख छ ।