आज देउवा र ओलीबीच भेटवार्ता हुँदै

६ जेठ, काठमाडौं । नेपाली कांग्रेस सभापति शेरबहादुर देउवाले प्रधानमन्त्री केपी ओलीबी भेटवार्ता हुने भएकाे छ । देउवा र ओलीबीच बिहीबार आज केहीबेरमा सिंहदरबारमा भेटवार्ता हुने तय भएको हाे ।

कोरोनाको संक्रमण रोकथाम, नियन्त्रण र उपचारका विषयमा सरकारको ध्यानाकर्षण गराउन प्रधानमन्त्री ओलीलाई भेटेर ज्ञापनपत्र बुझाउने तयारी भएको सहमहामन्त्री डा. प्रकाशशरण महतले जानकारी दिए।

भेटमा कांग्रेसकातर्फबाट वरिष्ठ नेता रामचन्द्र पौडेल, नेता कृष्णप्रसाद सिटौला, उपसभापति विमलेन्द्र निधि, महामन्त्री डा.शशांक कोइराला, सहमहामन्त्री डा.महतलगायतका नेतासमेत सहभागी हुनेछन्।

बुधबार बसेको कांग्रेसको संसदीय दल कार्यसमितिको बैठकले कोरोना रोकथाम, नियन्त्रण र उपचारका लागि सरकारको ध्यानाकर्षण गराउने र त्यसका लागि राज्यको सबै स्रोत, साधन र शक्ति खर्च गर्नुपर्ने माग गरेको छ।

यस्तै, कांग्रेसले आइतबार, सोमबार र मंगलबार सातै प्रदेशमा कोभिड–१९ को संक्रमणको अवस्थाबारे पार्टीभित्र छलफल चलाएको थियो। सो छलफलको निष्कर्षसहित महामारी नियन्त्रणमा गर्नुपर्ने कार्यहरूबारे सरकारको ध्यानाकर्षण गराइने सहमहामन्त्री डा. महतले बताए।