कक्षा ११ सम्मको परीक्षा विद्यालयलाई जिम्मा, कक्षा १२ को परीक्षा बोर्डले अनुकुल समयमा गर्ने

६ जेठ, काठमाडौं । कोरोना महामारीसँगै प्रभावित भएको माध्यमिक शिक्षा परीक्षा (एसईई) तथा कक्षा १२ को राष्ट्रिय परीक्षा सञ्चालन कसरी गर्ने भन्ने विषयमा राष्ट्रिय परिक्षा बोर्डले सुझाव संकलन गरेको छ । सुझाव संकलनको क्रममा  शिक्षाविद्हरुले यसबर्ष पनि एसईईको र कक्षा ११ परीक्षा विद्यालयलाई जिम्मा दिनुपर्ने  र कक्षा १२ को परीक्षा बोर्डले अनुकुल समयमा गर्ने  ब्यवस्था गर्न सुझाएका छन् ।

विज्ञहरुको सुझाव अनुसार नै कक्षा ११ सम्को परीक्षा विद्यालयलाई जिम्मा दिइने, कक्षा १२ को परीक्षा बोर्डले अनुकुल समयमा गर्ने तयारी बोर्डले गरेको छ । विद्यालयले पहिलो तथा दोस्रो तहको आन्तरिक त्रैमासिक परीक्षा लिइसकेकाले आन्तरिक मूल्याङ्कन गर्न समस्या नहुने भएकाले ११ कक्षासम्मको जिम्मा विद्यालयलाई नै दिन उपयुक्त हुने सुझाव शिक्षाविद एवम् अभिभावक शिक्षकहरुले दिएका छन् ।

कक्षा १२ को अन्तिम परीक्षा भने अनकूल समय मिलाएर राष्ट्रिय परीक्षा बोर्डले नै लिनुपर्ने सुझाव विज्ञहरुले  दिएका छन् । गत वर्ष पनि ४० नम्बरको लिखित परीक्षा, आन्तरिक मूल्याङ्कन तथा कक्षा ११ को परीक्षाको आधारमा कक्षा १२ को परीक्षा सञ्चालन गरिएको थियो । शिक्षा, विज्ञान तथा प्रविधि मन्त्रालयले भने वोर्डले संकलन गरेको सुझाब अध्ययन प्रतिवेदन प्राप्त भएपछि एसईई र कक्षा १२ को परीक्षाको मोडालिटीको बारेमा निर्णय गरिने जानकारी दिएको छ ।

कोरोना महामारीका कारण आठ लाखभन्दा विद्यार्थी प्रभावित भएका छन् । यसअघि बोर्डले जेठ १३ गतेबाट एसईई तथा जेठ अन्तिम साताबाट कक्षा १२ को परीक्षा लिने निधो गरेको थियो । कोरोना बढ्दै गई निषेधाज्ञाको चरणमा पुगेपछि परीक्षा स्थगित गरिएको छ ।