सुरक्षा निकायलाई उच्च मनोबल बनाएर कार्यक्षेत्रमा खटिन गृहमन्त्रीकाे निर्देशन

६ जेठ, काठमाडौं । गृहमन्त्री रामबहादुर थापाले शान्ति, सुरक्षा र कोरोना नियन्त्रणमा परिचालन हुन सुरक्षा निकायलाई निर्देशन दिएका छन् ।
प्रदेशका जनताको शान्तिसुरक्षाका साथै कोरोना नियन्त्रणलाई केन्द्रबिन्दुमा राखेर स्थानीय प्रशासन र सुरक्षा निकायका जनशक्तिलाई उच्च मनोबल बनाएर सम्बन्धित कार्यक्षेत्रमा खटिन गृहमन्त्री थापाले निर्देशन दिएका हुन् ।

आज बिहान हेटौँडामा बागमती प्रदेशका सुरक्षा निकाय, प्रमुख जिल्ला अधिकारी र सशस्त्र, नेपाल प्रहरी र राष्ट्रिय अनुसन्धान विभागका अधिकृतसँग भेटघाट गर्दै कोरोना नियन्त्रणका लागि प्रदेश सरकारसँग समन्वय गरेर जनतालाई कोरोनाबाट भयभीत हुनबाट मुक्त तुल्याई उनीहरूको उपचार कार्यमा सहजीकरण तुल्याउन सम्बन्धित कार्यालय प्रमुखले आफ्नो स्रोत–साधन परिचालन गरी सहयोग पुर्‍याउन आग्रह गरे ।

मन्त्री थापाले प्रदेशका हरेक जिल्लामा जनतालाई शान्ति, सुरक्षा मानव अधिकारको प्रत्याभूति दिलाउन एवं अपराध नियन्त्रणका लागि संघीय सरकारले हरप्रयासका साथ सीमित स्रोत–साधन परिचालन गरी जनतालाई विश्वस्त तुल्याउन सरकार कटिबद्ध रहेको पनि उल्लेख गरे ।

मन्त्री थापालाई मकवानपुरका प्रजिअ भरतमणि पाण्डेले मकवानपुर जिल्लामा कोभिड संक्रमण नियन्त्रणका लागि भइरहेको प्रयास, जिल्लाको शान्ति सुरक्षाको अवस्था र जिल्लामा हाल जनतालाई पुर्‍याउनैपर्ने सेवाका लागि सामान्य रूपमा भए पनि कर्मचारी राखेर सेवासुविधा दिइएको पनि जानकारी दिएका थिए । गृहमन्त्री थापाले जिल्ला प्रशासन कार्यालयको नवनिर्मित भवनका विभिन्न कार्यकक्षको पनि अवलोकन गरेका थिए ।