आज १४ वटा अन्तर्राष्ट्रिय उडान तथा अवतरण हुँदै

७ जेठ, काठमाडौं । त्रिभुवन अन्तर्राष्ट्रिय विमानस्थलबाट आज १४ वटा अन्तर्राष्ट्रिय उडान तथा अवतरण हुँदैछन् । केही यात्रुवाहक, केही कार्गो र दुई वटा एअर एम्बुलेन्सको उडान तथा अवतरणको तालिका रहेको विमानस्थल कार्यालयले जनाएको छ ।

हिमालय एअरलाइन्सका दुई वटा जहाज चीनको कुम्निङबाट बिहानै आइपुगेका छन् भने राति दुई वटै जहाज फेरि कुम्निङ जाँदैछन् । यस्तै चीनको सिचुआन एअरको कार्गो जहाज छेन्दुबाट मेडिकल सामग्री ल्याएर आउनेछ र फर्कनेछ । हिजो मेडिकल सामग्री ल्याएर स्पेनबाट आएको आइबेरिया एअरको जहाज आज यात्रु लिएर स्पेनको मड्रिड जाँदैछ ।

यस्तै हप्तामा दुई दिन उडान हुने तालिका अन्तर्गत एअर इन्डियाको जहाज काठमाण्डौ आएर यात्रु लिएर फर्कनेछ । यस्तै भियतनामबाट दिउँसो दुई बजे एउटा एअर एम्बुलेन्स आउँदैछ भने इण्डोनेसियाबाट पनि सवा चार बजे अर्को एअर एम्बुलेन्स आइपुग्ने तालिका रहेको छ ।

यस्तै बुद्ध एअरले किनेको नयाँ जहाज पनि आज भारतको नयाँ दिल्लीबाट काठमाण्डौ आइपुग्ने त्रिभुवन अन्तर्राष्ट्रिय विमानस्थल कार्यालयले जनाएको छ ।