ओली सत्ताको आयु लम्व्याउन कारिन्दा बनिन् राष्ट्रपतिः नेविसंघ  

७ जेठ, काठमाडौं । नेपाली कांग्रेसको भातृ संगठन  नेपाल विद्यार्थी संघले प्रधामन्त्री केपी शर्मा ओलीको सत्ता लम्ब्याउन राष्ट्रपति बिद्यादेवी भण्डारीले असंवैधानिक कदम चालेको ठहर गर्दै प्रधानमन्त्री र राष्ट्रपतिबाट भएका असंवैधानिक गतिविधिको घोर भत्सर्ना एवम् निन्दा गरेको छ ।

नेविसंघका अध्यक्ष राजीव ढुंगानाले शुक्रबार जारी गरेको विज्ञप्तिमा जनताको जीवन रक्षा गर्ने मुल दायित्वलाई बिर्सेर प्रधानमन्त्री केपी ओली सत्ता लम्ब्याउन राष्ट्रपति लोकतन्त्र र संविधानलाई कमजोर बनाउन लागिपरेको भन्दै ओली र भण्डारी बीचको गठबन्धनलाई सधैँका लागि परास्त गरिनुपर्ने बताएका छन् ।

कोरोना महामारीका कारण देश आज भयावह स्थितिबाट गुज्रिरहेको बेला सरकार जनताको जीवन रक्षाका निम्ति केन्द्रित भएर लाग्नु पर्नेमा कसरी सत्तामा टिकीरहने र सत्ताको आयू लम्व्याइरहने भन्ने एक सुत्रीय अभियानमा लागि रहनु सबै नेपालीका निम्ति दुर्भाग्यपूर्ण र विडम्वनापूर्ण  भएकाे नेविसंघको ठहर छ ।

‘संविधानको संरक्षक तथा राष्ट्रकै अभिभावक राष्ट्रपति समेत जनता बचाउने महान कार्यमा लाग्नुको सट्टा कुर्सी बचाउने तुच्छ कार्यमा ओलीको कारिन्दाको रुपमा लाग्नु नेपाली जनताको निम्ति लज्जा र आक्रोशको विषय हो । जनताको जीवन रक्षा गर्ने मूल दायित्वलाई चटक्कै विर्सिदै तथा लोकतन्त्र र संविधानलाई कमजोर पार्दै ओली सत्ताको आयु लम्व्याउन प्रधानमन्त्री र राष्ट्रपतिबाट भएका असंवैधानिक गतिविधिको नेविसंघ घोर भत्सर्ना र निन्दा गर्दछ ‌‌।’ विज्ञाप्तिमा भनिएको छ ।

ओलीले प्रधानमन्त्री बनेकै मितिदेखि लोकतन्त्र र संविधान कमजोर बनाउने गतिविधि गरेको, अव संसद भंग गर्दै संविधान पनि फल्न उद्धत रहेको र आफ्नो सत्ताको आयु लम्व्याउन जे सुकै गर्ने ओलीको कदममा आँखा चिम्लेर साथ दिने कारिन्दाको रुपमा राष्ट्रपति प्रस्तुत भएकाले लोकतन्त्र र संविधानको रक्षार्थ फेरि निर्णायक संघर्षको घडी आएको विज्ञाप्तिमा उल्लेख गरिएको छ ।