महन्थले नमाने माधव नेपाल तयार

७ जेठ, काठमाडौं । प्रधानमन्त्री केपी ओली र राष्ट्रपति विद्यादेवी भण्डारीको गलत र असंवैधानिक क्रियाकलापको भण्डाफोर गर्दै वैकल्पिक सरकार बनाउने उद्येश्यले विपक्षी दलका नेताहरुको बैठक कांग्रेस सभापति शेरबहादुर देउवा निवास बूढानिलकण्ठमा जारी छ ।

जनता समाजवादी पार्टीका अध्यक्ष उपेन्द्र यादव र नेता डा. बाबुराम भट्टराईसमेत पुगेपछि छलफल सुरु भएको हो । बैठकमा कांग्रेस पदाधिकारी बैठकले यसअघि गरेको निर्णय बमोजिम प्रधानमन्त्रीविरुद्ध अविश्वास प्रस्ताव र राष्ट्रपतिविरुद्ध महाअभियोग लगाउनेबारे छलफल हुने बुझिएको छ । यस्तै ओलीको विकल्पमा नयाँ सरकार बनाउने आधार तयार गर्ने अवस्थाबारेमा पनि छलफल हुने छ ।

ओलीले जसपाकै महन्थ ठाकुर पक्षको समर्थनमा फेरि सरकार बनाउने सम्भावना रहेको भन्दै उपेन्द्र–बाबुरामले नयाँ विकल्पमा छलफल गराउन चाहेका छन् । देउवा निवास आउनुअघि आफूहरुले महन्थलाई प्रधानमन्त्रीका लागि तयार हुन भनेको उपेन्द्रले जानकारी दिएको बुझिएको छ । तर महन्थले भने उपेन्द्रको प्रस्ताव कांग्रेस माओवादीले स्वीकार गरे मात्र आफ्नो धारणा दिने बताएको जानकारीपनि दिएका छन् ।

कदाचित महन्थले प्रधानमन्त्री बन्न अस्वीकार गरे लोकतन्त्र र संविधानको रक्षाका लागि एमाले नेता माधवकुमार नेपाललाई अगाडि बढ्नसमेत आग्रह गर्ने तयारी छ । महन्थको विकल्पमा माधवजी हुन सक्नुहुन्छ भन्दै उपेन्द्रले नै यस्तो प्रस्ताव राखेको स्रोतले जनाएको छ ।