महन्थ पक्ष फेरि पनि तटस्थ

७ जेठ, काठमाडाैं । विपक्षी दलहरुले जतिसुकै बल गरेपनि प्रधानमन्त्री केपी ओलीविरुद्ध वैकल्पिक सरकार दिन नसक्ने भएका छन् । जनता समाजवादी पार्टीको महन्थ–राजेन्द्र पक्षले यस्तो वातावरण तयार गरेका छन् । अहिले सिंहदरबारमा बसेको महन्थ–राजेन्द्र पक्षका सांसद्हरुको बैठकले ओलीविरुद्ध बन्ने सरकारमा सहभागी नहुने र फेरि पनि तटस्थ बस्ने निर्णय गरेपछि यस्तो वातावरण तयार भएको हो ।

राष्ट्रपति विद्यादेवी भण्डारीले संविधानको धारा ७६(५) बमोजिम सरकार गठन गर्न आज बेलुकी ५ बजेसम्मको समय दिएकी छन् । तर जसपाको एकल समर्थन बिना वैकल्पिक सरकार बन्ने आधार छैन । त्यसैले अब मुलुक मध्यावधि निर्वाचनतिरै धकेलिने अवस्था सिर्जना भएको छ ।

प्रमुख प्रतिपक्षी दल नेपाली कांग्रेसको भर्खरै सम्पन्न पदाधिकारी बैठकले प्रधानमन्त्रीविरुद्ध अविश्वास र राष्ट्रपतिमाथि अविश्वास प्रस्ताव ल्याउने निर्णय गरेको थियो । त्यसपछि देउवाकै पहलमा अहिले विपक्षी दलको गठबन्धन बैठक चलिरहेको छ । बैठकमा जसपाका अध्यक्ष उपेन्द्र यादवले महन्थ ठाकुरलाई नयाँ प्रधानमन्त्रीमा प्रस्ताव गरेका थिए ।

बैठकमा भाग लिन जानुअघि उनले महन्थलाई नयाँ सरकार बनाउन तयार हुन भनेका थिए । तर विपक्षीहरुको बैठकको निर्णय समेत नकुरी महन्थले फेरि पनि तटस्थ बस्ने निर्णय गरेको हो । अब ओलीको विकल्पमा एमाले नेता माधव नेपालले गर्ने निर्णय नै अन्तिम हुने देखिएको छ । ओलीलाई विस्थापन गर्न नेपाल स्वयं प्रधानमन्त्रीको दाबेदार हुने अवस्था वा सामूहिक राजीनामा मात्र विकल्प बाँकी रहेको छ ।