वर्तमान राजनीतिक संकटको समाधान जनमतसंग्रहबाट मात्र हुने विप्लवकाे दाबी

८ जेठ, काठमाडाैं । विप्लव नेतृत्वको नेपाल कम्युनिष्ट पार्टीले नेकपा र केपी ओली नेतृत्वको सरकार असफल भएकै कारण संसद विघटन भएको ठहर गरेको छ । प्रधानमन्त्री केपी ओलीको सिफारिसमा राष्ट्रपति विद्यादेवी भण्डारीले जेठ ८ गते रातिको समयमा संसद विघटन गरेपछि विप्लवले यस्तो बताएको हो ।

विसं २०७३ सालदेखि पार्टीले अहिलेको संसदीय व्यवस्था नेपाली जनताको चाहना र आवश्यकतासँग मेल नखाएको भन्दै आएकोमा अहिले आएर आफ्नो पार्टीको निष्कर्ष सही निस्केको विप्लवको भनाइ छ ।

झण्डै दुईतिहाइ जनमतसहित बनेको नेकपा र ओली नेतृत्वको सरकार कुनै व्यक्ति, पार्टी र सरकारको मात्र समस्या नभएरै संसदीय व्यवस्थाकै समस्या भएको विप्लवले जारी गरेको विज्ञप्तिमा उल्लेख छ ।

शनिबार महासचिव विप्लवले विज्ञप्ति जारी गर्दै वर्तमान राजनीतिक संकटको समाधान जनमतसंग्रहबाट मात्र हुने दाबी गरेका छन् । जनमतसंग्रहका लागि राजनीतिक राजनीतिक दलहरु तयार हुने भए त्यसका लागि संयुक्त सरकार बनाएर निकासका लागि आफ्नो पार्टी तयार रहेको समेत उनले बताएका छन् ।

विप्लव नेतृत्वको नेकपाले वर्तमान राजनीतिक संकटलाई सरकारको मात्र असफलता बताउन नहुने भन्दै फेरि संसदीय व्यवस्थाकै चुनाव घोषणा गर्नु देशलाई अझै संकटमा धकेल्ने चाल भएको समेत बताएको छ ।