इटालीकाे मोट्टारोनमा केबलकार खस्दा १४ जनाको मृत्यु

१० जेठ, एजेन्सी । इटालीमा केबलकार खस्दा १४ जना यात्रुको मृत्यु भएको छ । उत्तरी क्षेत्रस्थित म्यागिओर लेक नजिकैको पहाडमा आइतबार केबल कार खसेको बीबीसीले जनाएको हो ।

समाचारका अनुसार दुर्घटनामा एक बालक गम्भीर रुपमा घाइते भएका छन् । रिसोर्ट टाउनबाट यात्रुहरुलाई बोकेर पिएदमन्ट क्षेत्रस्थित मोट्टारोन पहाड जाँदै गर्दा केबल कार खसेको हो ।

घटनामा मृत्यु हुनेहरुमध्ये केही विदेशी नागरिक समेत रहेको बताइएको छ । दुर्घटनापछि ५ वर्ष र ९ वर्षका बालकहरुलाई उपचारका लागि नजिकको अस्पताल लगिएको बीबीसीले जनाएको छ । तर ९ वर्षीय बालकको उपचारको क्रममा मृत्यु भएको उल्लेख गरिएको छ ।

दुर्घटनाको कारणबारे अझै यकिन भइसकेको छैन । यसबारे छानविन गरिने स्थानीय प्रशासनले जनाएको छ ।