सत्ता प्राप्तिका लागि ठाकुर र महतोको दूतावासमा दौडधुप, रुक्मांगद कटवाल भारतीय दूतावासमा लुसुक्क

१० जेठ, काठमाडौं । मधेशमा क्षेत्रीय दलका रुपमा उदाएका नेताहरु भारतीय राजदूतावास गएनन भने आश्चर्य मान्नुपर्छ । दुई दिन अघि राजेन्द्र महताे सुटुक्क दूतावास छिरे । उनले त्यहाँ भर्खरै आएका रअका नेपाल प्रमुख राघवप्रसाद भट्नागरसहित एउटा टीमसँग छलफल गरेर फर्केका थिए । उनले नेपालका लागि भारतीय फ्ष्ट क्लास अफिसरसँग पनि छलफल गरेका थिए । नेपालको राजनीतिमा आएको उतारचढावसँगै मधेशवादी दलका नेताहरु भारतीय दूतावासमा पुग्ने गरेका छन् ।

प्रधानमन्त्री केपी ओलीले विश्वासको मत लिनूपूर्व वैशाख २६ गते महन्थ ठाकुर र राजेन्द्र महताे दुवै भारतीय दूतावास पुगेका थिए । त्यसकै परिणाम सरकारले नागरिकता अध्यादेश दिएको छ । अहिले नागरिकता अध्यादेश जारी भएपछि पछिल्लो पटक प्रधानमन्त्री ओलीले महन्थ ठाकुर नेतृत्वको जनता समाजवादी पार्टीलाई समेटेर नयाँ मन्त्रिपरिषद गठन गर्न लागेका छन् ।

यही बेला भूतपूर्व प्रधानसेनापति रुक्मांगद कटवाल भारतीय दूतावासमा लुसुक्क छिरेका छन् । जसपाका नेताहरु ठाकुर र महतो केही दिनदेखि नयाँ सरकार गठनका लागि लैनचौरस्थित भारतीय दूतावासमा परामर्श गरिरहेको र पूर्व राजा ज्ञानेन्द्र शाह भारतीय कुम्भ मेला पुगेर आएको सन्दर्भमा पूर्वसेनापति कटवालको दूतावास प्रवेशलाई जोडेर हेरिएको हेर्न थालिएको छ । कटवाल मधेसी दलका तर्फबाट ओली सरकारमा सहभागी हुन चाहन्छन् । उनले ओली सरकारमा गृहमन्त्री भएर मुलुकको सेवा गर्न चाहेको सूचना सुरक्षा निकायहरुलाई आएको छ । यद्यपि यो विषय बाहिर चर्चामा ल्याइएको छैन ।

स्रोतका अनुसार, कटवाल आइतबार साँझ भारतीय दूतावास पसेका थिए । शुरुमा नेपालका लागि भारतका राजदूत विनयमोहन क्वात्रासँग भेट गर्न गएको भनिए पनि उनले राजदूतसँग भेट गर्न पाएनन् । राजदूतले आफू व्यस्त भएको जानकारी उनलाई दिएपछि सेकेन्डम्यान र अन्य केही अधिकृत र रअका नेपाल प्रमुखसँग भेटघाट गरेर स्रोतको दावी छ ।

नेपालको राजनीतिका बारेमा पारदर्सिता र जवाफदेहिताको वकालत गर्दै सामाजिक सञ्जालहरुमा निकै कडा आलोचनात्मक टिप्पणी गर्ने कटवालले किन दूतावास छिरे भन्ने बारेमा केही आएको छैन । उच्च सुरक्षा स्रोतका अनुसार उनी एक्लै दूतावास गएका थिए । हालै भारतको सत्तारुढ दल बीजेपीको मातृ संगठन भनेर चिनिएको राष्ट्रिय स्वयंसेवक संघका केही कार्यक्रमहरुमा भाग लिने गरेको सूचना सुरक्षा निकायहरुमा प्राप्त भएको बताइएको छ । स्रोतका अनुसार उनी नेपालमा हिन्दु राज्यको वकालत गर्ने संघसंस्थाहरुसँग अप्रत्यक्ष रुपमा जोडिदै आएका छन् ।

कटवाल जस्तै एक वर्ष अघि सशस्त्र प्रहरीका बहालावाल डीआईजी पनि भारतीय राजदूतावास पुगेका थिए । डीआईजी प्रवीण श्रेष्ठले सरकारी सुविधाकै गाडी लिएर दूतावास गएको विषयले सुरक्षा निकाय र गृहमन्त्रालयसम्म तरंग पैदा गरेका थियो ।