विपक्षी दल कानूनी परामर्शमा, केही बेरमै रिट दर्ता हुने

१० जेठ, काठमाडौं । बहुमत सांसद्ले हस्ताक्षर गरी प्रधानमन्त्रीको दाबी पेश गरेका नेपाली कांग्रेसका सभापति शेरबहादुर देउवालाई शपथ गराउन माग गर्दै आज सर्वाेच्च अदालतमा रिट दायर गर्न विपक्षी गठबन्धनले अन्तिम कसरत गरिरहेको छ ।

सिंहदरबारस्थित नेपाली कांग्रेस संसदीय दलको कार्यालयमा विपक्षी पाँच दलका शीर्ष नेताहरु कानून व्यावसायीहरुसँग परामर्श गर्दैछन् । जेठ ७ गते साँझ ५ बजेसम्मको म्याद दिएकी राष्ट्रपति विद्यादेवी भण्डारी समक्ष १४९ जना सांसद्ले देउवालाई प्रधानमन्त्री बनाउन समर्थन गरेका थिए ।

संविधानको धारा ७६(५) अनुसार प्रतिनिधिसभामा वहुमत सिद्ध गर्ने आधार प्रस्तुत गर्ने सांसद्लाई प्रधानमन्त्री नियुक्त गर्नुपर्ने हो । तर राष्ट्रपति भण्डारीले त्यसो नगरी प्रतिनिधिसभा विघटन गर्ने सिफारिश सदर गरकी थिइन् ।

हिजैदेखि विपक्षी दलहरुले अदालतमा रिट दायर गर्ने तयारी गरेका भएपनि पर्याप्त समय नपुगेकाले आज गर्ने भएका हुन् । रिट निवेदनमा माधव नेपाल पक्षका २३ जनाले हस्ताक्षर गरिसकेका छन् । थप सात जनाले भने वारिसमार्फत आफ्नो सहमति जनाएका छन् । अबको केही बेरमै रिट दर्ता गरिने बुझिएको छ ।