उपत्यकामा संक्रमण दर नघटेपछि फेरि निषेधाज्ञा थप्ने तयारी

१० जेठ, काठमाडौं । काठमाडौं उपत्यकामा कोरोना भाइरस संक्रमण नियन्त्रण लिन जारी निषेधाज्ञा फेरि थपिने भएको छ ।  मंगलबार दिउँसो भर्चुअल माध्यमबाट निषेधाज्ञा थप्नेबारे छलफल हुनेछ । भोलि काठमाडौं, ललितपुर र भक्तपुरका प्रमुख जिल्ला अधिकारी (सीडीओ) बैठक बस्दैछ ।

गृहमन्त्रालय स्रोतका अनुसार थप एक साताका निषेधाज्ञा थप्ने विषयमा छलफल भइरहेको छ । कोरोनाको दोस्रो लहरको संक्रमण बढेपछि उपत्यकामा १६ वैशाखदेखि निषेधाज्ञा जारी गरिएको थियो । त्यसपछि २२ वैशाखमा पुनः एक साता निषेधाज्ञा थप गरिएको थियो ।

यता, सोमबार स्वास्थ्य मन्त्री हृदयश त्रिपाठीले पत्रकार सम्मेलनमार्फत आगामी चार सातामा संक्रमण क्रमशः घट्दै जाने बताएका छन् । शनिबार गृह मन्त्रालयले ७७ वटै जिल्लाका प्रमुख जिल्ला अधिकारीलाई परिपत्र गरेर निषेधाज्ञाको कडाइका साथ कार्यान्वयन गर्न पनि निर्देशन दिएको छ ।