पूर्व सभामुखसँग परामर्श गर्दै सापकोटा

११ जेठ, काठमाडौं । सत्ता संघर्ष उत्कर्षमा पुगेको बेला प्रधानमन्त्री केपी ओलीले दोस्रो पटक प्रतिनिधिसभा विघटन गरेपछि राजनीतिक वातावरण बिथोलिएको छ ।

राष्ट्रपति विद्यादेवी भण्डारीसँगको मिलेमतोमा ओलीले संविधान र लोकतन्त्रमाथि नै धावा बोल्न थालेको भन्दै सर्वत्र विरोध भइरहेका बेला विघटित प्रतिनिधिसभाका सभामुख अग्निप्रसाद सापकोटाले गाँठो फुकाउने उपाय सुझाउन पूर्व सभामुखहरुसँग छलफल गर्दैछन् ।

आज दिउँसो १ बजे संसद भवनमा उनले पूर्व सभामुखहरुलाई आमन्त्रण गरेका छन् । अहिलेको अवस्थामा कसरी अगाडि बढ्दा ठीक होला भन्ने उनको जिज्ञाशा रहने सभामुखका प्रेस संयोजक श्रीधर न्यौपानेले बताए ।

आज बोलाइएको पूर्व सभामुखहरुमा दमननाथ ढुंगाना, तारानाथ रानाभाट, रामचन्द्र पौडेल, कृष्णबहादुर महरा, सुभाषचन्द्र नेम्बाङ, ओनसरी घर्तीलगायत रहेका छन् ।